Украинада 2022-жылдын 16-январында жалпыга маалымдоо каражаттарын (ЖМК) жалаң мамлекеттик тилде чыгарууну милдеттендирген мыйзам күчүнө кирди.
Мыйзам 2019-жылы кабыл алынган жана ал медиа чөйрөдө орус тилинин үстөмдүгүн чектөө максатында киргизилген.
Документ орус тилине таптакыр тыюу салбайт, бирок ар бир орусча чыккан материал украин версиясы менен кошо бирдей көлөмдө берилип, бирдей тиражда чыгарылышы керек. Мыйзам Украинада катталган маалымат сайттарына, гезит-журналдарга тиешелүү.
Мыйзамдын тарапкерлери ал улуттук иденттүүлүктү чыңдайт деп ишенишет, аны сынга алгандар өлкөдө орус тилин алып жүргөн жарандардын укугун бузат деп эсептешет.
Мыйзамга мурдагы президент Петро Порошенко кызматтан кетерине аз калганда кол койгон. Андан берки убакыт өткөөл мезгил деп эсептелген. Медиа айдыңындагы бул өзгөрүү Украина менен Орусиянын ортосунда кырдаал чыңалган учурга туш келди. (ErN)
