Жугуштуу оорулардын республикалык клиникасынын жетекчиси Гүлжигит Алиевдин маалыматына караганда, соңку жумада дарыгерлерге кайрылгандардын саны үч эсеге көбөйдү.
“Өткөн жумаларда эле биздин ооруканага күнүнө 20-25 киши кайрылып аткан болсо, азыр 75-80ге чейин көбөйүп, алардын теңи ооруканада жатып дарыланууга өтүүдө. Коронавируска чалдыккандардын көбү орто курактан өйдө жашагандар, вакцина албагандар. Мындан сырткары кичине балдар да бар. Алардын эң кенжеси 6 айлык наристе”,- деди Гүлжигит Алиев.
Жугуштуу оорулардын республикалык клиникасында 100дөн ашык медицина кызматкери иштеп жатат, алардын 20дан ашыгы дарыгерлер.
Саламаттык сактоо министрлигинин маалыматына караганда, 12-январга карата вирус жуктургандардын саны 465ке чыкты. Бул акыркы бир нече айдагы эң чоң көрсөткүч.
Азыркы тапта эки миңден ашык киши дарыланууда. Алардын 523ү ооруканада, 1 514ү үйүндө жатат.
2020-жылдын март айынан бери ооруну жуктургандардын жалпы саны 186 878 болду. Вирустан бир суткада 97 киши айыкты. (KS)
