"Түрк аба жолдору" авиакомпаниясы Түркиядан Казакстандын Нур-Султан, Алматы жана Актау шаарларына 9-январга чейин рейстерди токтотту. Бул тууралуу 7-январда мамлекеттик "Анадолу" агенттиги кабарлады.
Учурда Стамбул аэропортунда жүздөгөн казакстандык жүргүнчү кармалып турганы кабарланды. Алардын арасында жаш балдар жана кары кишилер бар экени айтылууда.
Казакстандык "Эйр Астана" компаниясынын да Түркия - Казакстан каттамы боюнча рейстери токтогон. Ал эми Стамбул - Чымкент каттамы кадимки тартипте иштеп жатат.
Бейшембиде Кыргызстандын Тышкы иштер министрлиги "Алматы" эл аралык аэропорту 19-январга чейин иштебей турганын билдирген.
2-январда Жаңы-Өзөн шаарындагы суюлтулган газдын баасын арзандатууну талап кылган митингчилерди колдогон акциялар бир нече күндөн бери Казакстандын ондон ашык шаарында уланып жатат.
5-январда демонстранттар Алматы шаарындагы мэриянын имаратына кирип барышкан. Алматыда "антитеррордук операция" жүрүп жатканы кабарланууда. Казакстандын жалпы аймагында өзгөчө абал жарыяланды. (ElB)
