Евробиримдик өлкөлөрүнүн тышкы иштер министрлери Беларустагы акциялардын катышуучуларын куугунтуктоого катышы бар аткаминерлерге каршы санкция киргизүүгө макулдаша алышкан жок.
Евробиримдиктин тышкы саясат боюнча башкы комиссары Жозеп Боррел уюмдагы 27 өлкөнүн тышкы иштер министрлеринин жолугушуусун жыйынтыктап жатып, Кипрдин позициясынан улам консенсуска келүү мүмкүн болбой калганын айтты.
Жозеп Боррел Евробиримдик Беларустун ички ишине кийлигишпей турганын, бирок өлкөдө диалогдун башталышына жардам берүүгө дилгир экенин кошумчалады. Эл аралык француз радиосу Боррел шаркет Беларуста өткөн шайлоонун жыйынтыктарын жана Александр Лукашенконун президенттигинин легитимдүүлүгүн тааныбай турганын ишарат кылганын кабарлады.
ТАСС менен AFP агенттиктери санкция киргизүүгө Кипрдин позициясы тоскоол болгонун, бул өлкө Лукашенконун режими менен катар Жер ортолук деңиздеги кен издөө аракеттери үчүн Түркияга да санкция киргизүүнү талап кылып жатканын жазышты.
Кипрдин ТИМ башчысы Никос Христодулидис адам укуктарынын бузулушуна карата Евробиримдиктин позициясы бардык өлкөлөргө бирдей болушу керек экенин билдирди.
Санкция боюнча акыркы чечим 24-сентябрда Евробиримдиктин саммитинде кабыл алынат.
