Шайлоого бир күн калганда беларус бийлиги "Настоящее Время" телеканалынын үч кызматкери - Юрий Баранюк, Ирина Ромалийская жана Иван Гребенюкту өлкөдөн чыгарды. Үч журналист тең депортацияланып, өлкөгө киришине 10 жылга тыюу салынды. Бийликтин чечими менен журналисттер Украинанын Одесса шаарына жөнөтүлдү.
Ромалийская менен Гребенюк Украинанын, Баранюк Орусиянын жараны. Алар 7-августта Беларус баш калаасындагы "Минск" мейманканасында кармалган. Журналисттер Беларуска жекшембиде өтчү президенттик шайлоонун жүрүшүн чагылдырганы барышкан.
Июлдун ортосунда Беларуста президенттик шайлоонун алдындагы бийликтин кадамына каршы акцияларды чагылдырып жүргөн медиа кызматкерлери да кармалган. “Эркин Европа/Азаттык” радиосунун Беларус бөлүмүнүн эки кызматкери кармалып, кайра бошотулган.
Буга чейин Борбордук шайлоо комиссиясы төрт күндүк алдын ала шайлоого шайлоочулардын 32,24% пайызы катышканын жарыялады.
Маалыматка караганда, алдын ала шайлоодо добуш берген шайлоочулар 6 834 081 кишини түздү.
Өлкөнүн Башкы прокуратурасы байланыш жана маалыматташтыруу министрине кайрылып, добуштарды эсептеген "Голос" көз карандысыз сайтынын ишин чектөөгө чакырды. Буга чейин президент Александр Лукашенко сайттын мыйзамдуулугун текшерип чыгуу керектигин айткан. Боршайкомдун төрайымы добуштарды көз карандысыз саноо демилгесин "зыяндуу жана кылмыштуу долбоор" деп атаган.
Көз карандысыз байкоочулар Беларуста алдын ала шайлоодо мыйзам бузуулар болгонун бир нече жолу билдиришти.
Шайлоо комиссияларынын кызматкерлери байкоочулар менен журналисттерди добушканалардан кууп, бюллетень салынган үкөктөр түнү бою кайтаруусуз калган фактылар болгону маалымдалган.
Минск шаарында 8-августта президенттикке талапкер Светлана Тихановскаянын шайлоо штабынын башчысы Мария Мороз кармалды.
МБХ-медиа кабарлагандай, Мария Мороз 10-августка белгиленген сотко чейин милиция бөлүмүндө кармалат. Ушул эле күнү Боршайком каттабай койгон дагы бир оппозициялык талапкер Виктор Бабариконун шайлоо штабынын жетекчиси Мария Колесникова кармалып, кайра бошотулду. Колесникова кармалгандан жарым сааттан кийин аны башка киши менен алмаштырып алганы, милиция кызматкерлери андан кечирим сурап кое бергени тууралуу маалымат тарады.
Бабариконун өзү буга чейин камакка алынган. Июлдун ортосунда Беларус Борбордук шайлоо комиссиясы оппозициялык талапкерлер - Виктор Бабарико менен Валерий Цепкалону каттоодон баш тарткан.