Беларус убактысы боюнча саат 9:00дө (Бишкек убактысы боюнча түшкү 12:00) шайлоо бекеттери ачылып, добуш берүүчүлөр келе баштады. Социалдык тармактарга чыгып жаткан видеолордон айрым бир бекеттерде кезек күткөндөрдү көрүүгө болот.
Москва, Киев шаарларындагы Беларус элчилигинин алдында добуш берүү үчүн кезек күткөндөр мүнөт сайын көбөйүүдө. Шайлоого келгендердин көбү колуна ак тасма тагып алышкан. "Настоящее время" каналынын журналисттери менен баарлашкандардын көбү бул жолку шайлоо өлкөгө өзгөрүүлөрдү алып келет деген үмүтүн билдиришти.
Шайлоо күнү Беларуста Интернет байланышы үзгүлтүккө учурап жатат.
“Настоящее время” каналынын кабарчысынын айтымында, мобилдик интернет байланышы үзүлдү. “Настоящее время” Беларустагы бир нече эксперт менен түз ободо байланыша албай койду.
"Onliner" басылмасы, айрым дүкөндөрдө “терминалдар техникалык себептерден улам иштебейт” деген жазуулар пайда болду.
Беларустагы “Медиазонанын” кабарчылары ByFly, MTS, Life, "Космос ТВ" операторлорунун интернети иштебей калганын айтышты.
“Белтелеком” компаниясынын директорунун орун басары Вадим Шайбаков “чет өлкөлүк трафиктен улам каналдарга күч келип жатканын” билдирди.
Эгерде кечинде өтө көп добуш берүүчү келсе, шайлоо бекеттеринде өткөрмө режими киргизилиши мүмкүн. Бул тууралуу Беларустун Борбордук шайлоо комиссиясынын башчысы Лидия Ермошина билдирди.
Мунун алдында президенттикке талапкер Светлана Тихоновскаянын штабы шайлоочуларга кайрылып, кечке жуук добуш берүүгө үндөгөн. Штаб мындай жол менен шайлоодо бурмалоолорду азайтууга болорун айткан.
“Шайлоочуларга кайрылып, эртең менен же күндүз добушун берүүгө чакырам. Себеби кечинде бийликтин оппоненттери эл көп топтолот деп убада берүүдө. Мындай учурда шайлоо бекеттеринде өткөрмө режими киргизилип, комиссия мүчөлөрү канча бюллетень берсе, ошончо сандагы шайлоочулар гана киргизилет. Ал эми кечинде бюллетендер аз болот”, деди Ермошина.