Нааразылык акцияларынын катышуучулары Жеңүүчү проспектинде кетип баратышат.
Баш калаадагы каршылык көрсөткөндөр сыяктуу эле Беларустун Гродно жана башка шаарларынын жашоочулары жергиликтүү убакыт боюнча саат 12:00дө нааразылык акцияларына чогулуп жатышат.
«Азаттыктын» беларус кызматынын маалыматына ылайык Гроднонун тургундарынын шаардын борборуна бараткан колоннасын күч түзүмдөрү айнек завод менен филармониянын жанынан тосуп чыгып кармап киришти. «Медиазонанын» маалыматы боюнча кармоо учурунда газ чачыратылган болушу мүмкүн, анткени адамдар жөтөлгөн бойдон качып баратышты.
Күч түзүмдөрүнүн Гроднодогу кызматкерлери нааразылык акциясына чыккандардын колоннасын токтотууга аракет кылып, бир нече адамды кармашты.
5-сентябрда Минскиде тилектештик жүрүшүнө катышкан студенттер кармалды. Күч түзүмдөрүнүн беткапчан кызматкерлери номери жок автобустарга студенттерди түртүп киргизип жатышты. ИИМдин маалыматы боюнча жалпысынан өлкө боюнча 91 киши кармалып, алардын ичинен 34 адам сотко чейин темир тор артында калды. Мекеме билдиргендей, акциялар Беларустун 18 калктуу пунктунда өтүп, ага төрт миңдей киши катышты.