Беларустун Ички иштер министрлиги 5-сентябрда акцияларга катышканы үчүн өлкө боюнча 91 киши кармалганын билдирди. Мекеменин расмий маалыматына караганда, акциялар Беларустун 18 жеринде өтүп, ага төрт миңдей гана киши катышты. Кармалган 91 адамдын 34ү сотко чейин камакта калып, калганы бошотулду.
Күч түзүмдөрү Минск мамлекеттик лингвистикалык уинверситетинде окуган теңтуштарына тилектештик билдирип чыккан студенттерди да кармаган. «Весна» борбору 15 студент кармалганын ишембинин кечинде маалымдады.
Ушул эле күнү Минскиде миңдеген аялдар шаардын башкы көчөсүндө жүрүш уюштурушту. 6-сентябрда бүткүл өлкөдө «Биримдик маршы» пландалган.
Президенттик шайлоодо азыркы мамлекет башчы Александр Лукашенко менен атаандашып, бирок расмий маалымат боюнча утулуп калган жана добуш берүүдөн кийин өлкөдөн чыгып кетип, Литванын борбору Вилнюста жүргөн оппозициялык талапкер Светлана Тихановская Вилнюстан түз эфирге чыкты.
«Жекшембиде абакка күн сайын камалып жаткандар жана көптөн бери ал жакта отургандар менен биздин тилектеш экенибизди дүйнөгө көрсөтүүгө мезгил келип жетти. Биз өз алдынчалык үчүн бирге экенибизди көрсөтүшүбүз керек», - деди Тихановская.
Минскиден журналисттер «Биримдик маршын» утурлай күч органдары баш калаага аскердик техника киргизгенин кабарлашты. TUT.BY сайты Эгемендик аянты курчоого алынганын, ага алып барчу бардык жолдор жабылганын жазды.
Акция Минск убактысы боюнча саат 13.00дө башталары айтылган.
9-августтагы шайлоодо учурдагы президент Александр Лукашенко негизги атаандашы Светлана Тихановскаяны жеңип, добуштардын 80% жакынын алганы расмий жарыяланган. Шайлоодон бери өтүп келе жаткан нааразылык акциянын катышуучулары иш жүзүндө оппозиялык талапкер утканын билдирип жатышат.
Беларустагы акцияда жүздөн ашуун адам кармалды
Минскинин Эгемендик аянтынан жүздөн ашуун кишини полиция кармап кетти.
Жүрүштүн алдында Ички иштер министрлиги жарандарга уруксатсыз митингге чыкпоону эскертип, Минск полициясы журналисттерге акциянын катышуучуларынан 100 метр алыс болууну сунуш кылды.
29-августта беларус баш калаасынын борборуна 10 миңдей киши, негизинен аялдар жүрүшкө чыкты. Алар «Саша, кызматтан бошотулдуң!» - деп ураан чакырып жатышты.
Ал күнү Минскиде жана өлкөнүн башка аймактарында отуздай киши кармалды.
Латышонок: Бийлик оппозиция менен сүйлөшпөйт
30-августтун кечинде аянтта калгандарга президент Лукашенконун жардамчысы Николай Латышонок жолукту. Ал шайлоодон кийин өз укугун коргоп чыккандарга эмне үчүн бийлик аёсуз мамиле жасаганын түшүндүрдү. «Алар баррикадаларды коюп, жолдон өткөн карапайым тургундарга тоскоолдук кылышты» - деди беларус бийлигини өкүлү.
Латышонок ошондой эле бийлик оппозиция менен сүйлөшпөй турганын белгиледи. Ал президент Лукашенко Минскидеги өзүнүн резиденциясында экенин айтты.
Орусиянын «Риа Новости» мамлекеттик агенттиги резиденциясында автомат кармап, ары-бери басып жүргөн Лукашенконун сүрөтүн жарыялады. Бирок сүрөт качан тартылганы белгисиз.
Жүрүштүн катышуучулары “Минск – баатыр шаар” эстелигине багыт алышты. Буга чейинки митингдерге чыккандар үч аптадан бери ушул жерде чогулуп жатышкан. Күч кызматкерлери эстеликтин тегерегин курчап, эч кимди өткөрбөй турушат. Бүгүнкү митингге, ар кандай эсептер боюнча, 220 миңден ашык адам катышууда.