“Тынчтык жана эгемендик жүрүшү” Беларустун Могилев, Гродно, Бобруйск жана башка шаарларында өтүп жатат. Минскидеги “Эгемендик” аянтынын тегерегин күч кызматкерлери темир кашаалар менен тосуп чыкты. Ушул сааттарга карата 100гө жакын адам кармалганы кабарланды.
Митингге чыккандар “Лукашенко, кет!”, “Саша, акыркы туулган күнүң менен!” - деп кыйкырып жатышат.
Бүгүн Александр Лукашенконун туулган күнү. 30-августта Беларустун президенти 66 жашка чыкты.
Минскиде Александр Лукашенкого каршы нааразылык акциялары уланууда. «Тынчтык жана эгемендик жүрүшүнө” миңдеген адам чыкты. Бишкек убактысы боюнча кечки саат 6да түшкөн маалыматка ылайык, 30га жакын адам камакка алынды.
Минскиде президент Александр Лукашенкого каршы өтүп жаткан митингдин катышуучуларын күч кызматтары кармап кетүүдө. Бул тууралуу митингде жүргөн кабарчыбыз маалымдады. Мындан эки саат мурда Эгемендик аянты полициянын курчоосуна алынып, автозактар жана суу бүрккүч техника келген.
Минск шаарынын чок ортосундагы Эгемендик аянты полициянын курчоосуна алынып, автозактар жана суу бүрккүч техника алып келинди. Аянтта бүгүн, 30-августта "Тынчтык жана эгемендик жүрүшү" болору кабарланган.
Эгемендик аянтында 9-августтан бери президенттик шайлоонун жыйынтыгына нааразылык акциялары токтобой уланууда.
Шайлоодо учурдагы президент Александр Лукашенко 80% ашуун добуш менен утуп чыкканы расмий кабарланган. Оппозиция буга каршы чыккан.
Өлкөнүн бир катар шаарларында жапырт нааразылык акциялары башталган. Полиция менен кагылыштарда жүздөгөн адамдар жабыркап, үч киши набыт болгону расмий кабарланган.
Кармалып, камакка алынгандар уруп-сабоого туш болушканын бошотулгандан кийин маалымдашкан.
АКШ, Британия, Швейцария жана Евробиримдик өлкөлөрүнүн Минскидеги өкүлчүлүктөрү 29-августта бийликтин демонстранттарга күч колдонуусун сындап, кармалгандарды бошотууну талап кылышкан. Билдирүүлөрдө кризистик кырдаалдан чыгуу тынч сүйлөшүүлөр аркылуу гана чечилүүсү тийиштиги белгиленген.