Орусия Беларус бийлигинин оппозиция менен диалог маселеси боюнча кайсы гана чечим болбосун кабыл алат. Бул тууралуу Орусиянын тышкы иштер министри Сергей Лавров билдирди. Ошол эле маалда Лавров “украин сценарийин” эске салып, Беларустагы конституциялык реформага багытталган курсту келечектүү деп эсептей турганын белгиледи.
«Биз Беларустун жетекчилиги өз калкы менен диалог жүргүзүү боюнча кабыл алган кайсы гана чечимге болбосун каршы эмеспиз. Бирок ортомчулук Батыш мамлекеттеринин катышуусу менен гана натыйжалуу болот деп Батыш өлкөлөрү айтса - алар жетекчилик кылган сүйлөшүүнүн айынан тараптар бири-бири менен сүйлөшпөй калганы баарынын эсинде», – деген Лавровдун сөзүн «Интерфакс» жазып чыкты. Орус ТИМинин башчысы «беларус эли бул кырдаалдан кандай чыгарын өзү чечерин» билдирди.
Беларуста өтүп жаткан митингде демонстранттар курман болгондорду бир мүнөт унчукпай эскерип турушту. 9-августта өткөн президенттик шайлоодон кийин башталган митингдерде жалпысынан беш адам өлдү.
Минскинин борборуна түмөндөгөн адамдар чогулганы кабарланууда. «Наша нива» каналы Беларус баш калаасында жүз миңдеген адамдын чогулганын жазды. Ал эми оппозициячыл NEXTA чогулгандардын санын 100 миңге чейин деп кабарлап жатат. Ушундай эле маалымат менен "Еврорадио" да бөлүшүүдө. «Ачык медиа» басылмасы Эгемендик аянтына эл жык-жыйма толгонун, ал жакка болжол менен 200-300 миң адам батарын жазды.