Футбол боюнча дүйнө чемпиону болуп келген Германиянын футболчулары быйылкы чемпионатта өз тайпасынан дагы чыкпай калды. Кечээ алар Түштүк Корея менен чечүүчү үчүнчү беттешти өткөрүп, кореялыктар немистерди 2:0 эсеби менен утуп алды. Натыйжада Германия өз тайпасында жалгыз үч упайы менен 1/8 бөлүккө чыгуу мүмкүнчүлүгүн жоготту. Ал эми немистерди утканына карабай Корея үчүн да чемпионат аяктады. Анткени “F” тайпасында Швеция жана Мексика алтыдан упай чогултуп, кийинки финалдык бөлүккө жолдомо алды.
“Е” группанын алкагында болсо Бразилия менен Швейцариянын курама командалары чемпионаттагы жүрүшүн улантса, Сербия жана Коста-Рика үчүн дүйнө чемпионаты аяктады.
Бүгүн Англия – Бельгия командалы “G” тайпасында биринчи орун үчүн ойнойт, ал эми “Н” тобунда Жапония Польша менен, Сенегал Колумбия менен ойномокчу. (SDz)
