Одесса шаарында төрт жыл мурун Киевди колдогон жана орусиячыл демонстранттардын кагылышында каза тапкан 48 кишини эскерүү болуп жатат.
Бүгүн миңден ашуун полиция жана коопсуздук күчтөрүнүн өкүлдөрү 2014-жылы Куликов талаасы менен Профсоюздар имаратында кандуу кагылыштар болгон жерге тартылды. Одессанын аймактык полициясы иш-чарага баргандар атайын текшерүүдөн өтүп киргизилип жатканын билдирди. 2500дөй полиция жана улуттук армиянын аскерлери шаардын көчөлөрүнө көз салууда.
Украинанын коопсуздук кызматы коммунисттик жана нацисттик эн-белгилерди көрсөтүүгө тыюу салынганын маалымдады.
2-майда орусиячыл жана Украинанын таламын талашкан активисттер эскерүү иш-чарасына чогулушат. Айрым учурларда мындай иш-чаралар кагылышуу менен коштолгон.
2014-жылы 2-майда Одесса шаарында Профсоюздар үйүндөгү кагылышуудан 48 киши өлүп, жүздөгөн адамдар жарадар болгон эле. Бул окуя Украинада эмгиче араздашууга себеп болуп келатат.
