Жапониянын түндүк-чыгышында табият кырсыгынан улам 90 миңден ашык адам там-жайын таштап качты. Эки күндөн бери нөшөрлөп төккөн жамгырдын кесепетинен Кинугава дарыясы нугунан чыгып, Токионун түндүгүндөгү Жосо шаарын көздөй агылууда.
Премьер-министр Синдзо Абэ суу ташкында жабыркагандар коопсуз жайларга көчүрүлүп жатканын билдирди:
- Бул чөлкөмгө эбегейсиз катуу жамгыр жааганы тынчсыздандырат. Өкмөт адамдарды куткарууга жана чоң мүшкүлгө жол бербегенге бар аракетин жумшоодо.
Телеканалдар үйлөрдүн чатырына чыккан адамдарды тикучарлар куткарып жатканын, суу алган тамдар менен автомобилдерди көрсөтүүдө. Жапониянын ортолук бөлүгүн каптаган Этау бороон-чапкытында 15 адам жарадар болгону маалымдалды.
