Американын коргоо министрлигинин расмий өкүлү Дэвид Сидней сенаттагы жыйында сүйлөп жатып, ушул жылдын 11 айында АКШ Борбор Азиядагы темир жол каттамы аркылуу Ооганстандагы аскерлерине 5 миңдей контейнерде куралдан башка буюмдарды жибере алганын билдирди. Жүк Орусия, Казакстан, Өзбекстан жана Тажикстандын аймагы аркылуу өтөт. Сиднейдин айтымында, Кошмо Штаттары Ооганстандагы аскер күчтөрүнө жиберилчү жүктү келерки жылдан тарта дагы көбөйтүүнү пландаштырып жатат. Анткени Америка ал жакка кошумча 30 миң аскер жибермекчи.
