Ооганстанда кооптуу жагдай сакталууда

Газни провинциясында Ооган качкындарына жардам берүүчү даниялык комитеттин жергиликтүү төрт кызматкери өлтүрүлдү.
Газни Ооганстандын түштүк чыгышындагы провинция. Губернатор Ажы Ассадулла бүгүн билдиргенге караганда, төрт кызматкер эки күн мурда талибдер деп шектелген согушчандардын буктурмасына кабылган. Жарадар болгон бешинчи ооган качып кутулган.
Даниялык уюм кызматкерлери чабуулда өлүшкөнүн тастыктады, бирок чабуулду ким жасаганы белгисиз деп билдирди.