Бөйрөк оорусу Ак үй алдына чыгарды
Кыргызстанда бюджеттин эсебинен гемодиализ алууга муктаж болгон 110 адам бар. Ал эми өлкөдө өнөкөт бөйрөк оорусу менен жабыркагандар саны бир жарым миңге жакын. Алардын беш жүзгө жакыны учурда республикалык бюджет эсебинен канын тазалатышса, тез арада 158 адам бөйрөк алмаштырууга муктаж. Жеке медициналык борборлордон канын тазалаткан оорулуулар бюджеттик гемодиализге жылдап кезек күтүп жатышкандыктарын айтышат. Алар жумасына эле гемодиализге 20 миң сомдон ашык каражат кетип жатканына байланыштуу Ак үй алдына күн алыс нааразычылыкка чыгып жаткандарын билдиришүүдө. Арасында кезеги жеткиче өмүр менен кош айтышып кеткендери да жок эмес.