Экономика

Аны 27-майда таң эрте аэропорттон Өзбекстандын президенти Шавкат Мирзиёев тосуп алды.

Эки президенттин расмий жолугушуусу Ташкенттеги "Көксарай" резиденциясында өттү. Тараптар чакан форматта да сүйлөштү.

Путин кызматка кайрадан киришкенден бери алгачкылардан болуп Өзбекстанга мамлекеттик сапар менен келгенин белгиледи:

"Бул шайлоо жана ага байланыштуу бардык жол-жоболор, анын ичинде өкмөттү түзүүгө байланыштуу иш-чаралар аяктагандан кийинки биринчи сапарлардын бири болгону кокусунан эмес. Бул биздин стратегиялык өнөктөштүгүбүздүн жана өнөктөштүк мамилелерибиздин өзгөчө мүнөзүн айгинелейт".

Ал эми Шавкат Мирзиёев быйыл эки тараптуу соода жүгүртүүнү 20 миллиард долларга жеткирүү аракети көрүлүп жатканына токтолду:

"Соода жүгүртүү тууралуу айта турган болсок, быйыл 10 миллиардга жетти. Бул абдан жакшы өсүш. Кесиптештерим менен жакынкы келечекте бул сумманы 20 миллиардга жеткирүүнүн үстүндө иштеп жатабыз".

Өзбекстандын президентинин басма сөз кызматы билдиргендей, өлкө башчылары ишканалардын долбоорлорун колдоо үчүн "Биргелешкен инвестициялык платформаны" ишке киргизүү боюнча макулдашууга кол коюшту.

Алар өзөктүк энергетика, айыл чарба, инновациялар, миграция, коопсуздук жана башка тармактарда кызматташууну өнүктүрүү маселелерин талкуулашканы кабарланды.

Ошондой эле Ташкенттеги жолугушууда билим берүү жана инженердик кадрларды даярдоо жаатында кызматташууга өзгөчө көңүл бурулду. Бауман атындагы Москва жогорку техникалык окуу жайынын жана Тышкы соода академиясынын филиалдарын Өзбекстанда ачуу боюнча макулдашууга кол коюлганы айтылды.

"Интернетте Путинди сөгүп атышат"

Путиндин коңшу өлкөгө сапары социалдык тармактардын бир топ колдонуучуларына жакпаганын алардын билдирүүлөрүнөн улам байкоого болот. Өзбекстандык блогер жана журналисттер "түндүктөн келген конок" деп тергелген Путин ыңгайсыз кырдаал жаратып атканын ачык да, кыйытып да жазышты.

"Мунун баскан изине чөп чыкпайт.. Майдын 26сында футболка менен жүрүп үшүдүм", - деп жазат журналист Муслим Мирзажонов.

"Киши өлтүргүч... Тилекке каршы, башка аргабыз жок, биз кичинекей мамлекетпиз", - дейт блогер Худойберди Зомини.

"Түндүктөн келген коноктун келишин зыярат эмес, кемсинтүү деп айткым келет. Анткени бул сапар бизге сый-урмат алып келбей турганы айдан-ачык", - деп жазган диний аалым Мубашшир Ахмед.

Дагы бир блогер Дима Каюм маркум акын Мухаммад Юсуфтун "Чочколор" деген ырын Фейсбуктагы баракчасына илип, "сөз ээсин табат" деп жазды.

Путиндин Ташкентке сапарынын алдында шаарда коопсуздук чаралары күчөтүлдү. Жол кыймылынын коопсуздугун камсыздоо кызматы 26-27-май күндөрү "Эл аралык масштабдагы иш-чараларга жана айрым көчөлөрдө көрктөндүрүү жана курулуш-монтаждоо иштери жүрүп жатканына байланыштуу" айдоочуларга борбор калаага келбей турууну сунуштаган билдирүү тараткан.

Блогер жана юрист Зафарбек Солижонов азыркы кырдаал тууралуу мындай көз карашын бөлүштү:

"Интернетте Путинди сөгүп атышат. Туура кылышат. Ал өзү жана тегерегиндегилер согушка карата өзбек элинин мамилесин билиши керек. Бирок мен мамлекеттик кызматкерлердин бул ишке аралашуусун жана жок жерден дипломатиялык чыр-чатактын чыгышын каалабайм. Ошол эле учурда санкциялардан улам алдоо жолу менен ресурс издеп жүргөндөрдүн акчасын алуу аракети да бар", - дейт блогер.

Ал эми Орусия менен Өзбекстандын мамилесин колдогондор бул өлкөдө бир нече миллион өзбекстандык эмгек мигранттары оокат кылып жатканын жүйө кылып келишет.

Талдоочу Анвар Назир Орусияда өзбек мигранттарынын келечеги жок деп эсептейт:

"Орус өкмөтү эмгек ресурстарына болгон муктаждыктын фонунда да Орусия экономикасынын түрдүү тармактарынан эмгек мигранттарын чыгарып жатат. Орусия менен өнөр жай тармагында кызматташуу мүмкүнчүлүгү жок, анткени Орусиянын бүт өнөр жайы армияга, башкача айтканда, курал-жарак чыгарууга өтүп жатат, ошондуктан Өзбекстан мындан пайда көрүшү мүмкүн эмес", - деп жазды ал Фейсбуктагы баракчасына.

Деген менен эл аралык иликтөөчүлөр Өзбекстан санкциялык товарларды Орусияга реэкспорт кылып жаткан негизги өлкөлөрдүн бири экенин айтып келишет. Орусиянын монополиялык "Газпром" компаниясы 2023-жылдан тарта Өзбекстанга газ жеткире баштаган. Бүгүнкү күндө Москва Ташкенттин негизги соода өнөктөштөрүнүн бири бойдон калууда. Бул көрсөткүч боюнча Орусия Кытайдан кийинки экинчи орунда турат.

Рамзан Кадыровдун сапары

Путиндин делегациясынын курамында "оор илдетке чалдыкканы" айтылган Чеченстан жумуриятынын лидери Рамзан Кадыров бар экени белгилүү болду. Ал Ташкентке Путинден бир күн мурда барып, биргелешкен жыйынга катышкан.

Аны аэрпорттон Ташкенттин акими Шавкат Умурзаков, Өзбекстандын президентинин күйөө баласы Отабек Умаров жана башка жооптуу адамдар тосуп алышты. Ушул эле күнү Рамзан Кадыров Өзбекстандын премьер-министри Абдулла Арипов менен да жолукканы кабарланды.

Кадыров чечендер Өзбекстанга өзгөчө жылуу мамиле кыларын, анткени анын атасы, Чеченстандын биринчи президенти Ахмат Кадыров Ташкент шаарында билим алганын Телеграм каналына жазды:

"Ташкентте жүрүп сүйүктүү атам, Чечен Республикасынын биринчи президенти, Орусиянын баатыры Ахмат-Ажы Кадыровдун өмүрү менен байланышкан жерлерди кыдырбай коё албадым".

Өткөн айда "Новая газета Европа" басылмасы Кадыровдун саламаттыгы начарлап баратканын жазган. Маалыматка караганда, дарыгерлер Кадыровго "уйку безинин некрозу" деген диагноз коюшкан.

Бирок видеолордо чечен лидери Ташкентте музей жана мемориалдарды кыдырып, жада калса Шавкат Мирзиёевдин эки күйөө баласы менен чоң ресторандарда ырчы-чоорчулардын коштоосунда көңүл ачканын көрүүгө болот.

Путин менен Мирзиёев акыркы жолу быйыл 9-майда Москвада жолугушкан. Анда өзбек президентинин басма сөз кызматы сүйлөшүүнүн жүрүшүндө "стратегиялык өнөктөштүктү" бекемдөө жана соода-экономикалык кызматташтыкты өнүктүрүү маселелери талкууланганын билдирген.

Орус президенти президенттик кызматка киришкенден кийин биринчи чет элдик сапарын Кытайга жасаган, андан соң Беларуска барып кайткан.

2023-жылы мартта Гаагадагы Эл аралык кылмыш соту Украинанын аймагындагы жаш балдарды мыйзамсыз депортациялоо боюнча күнөөлүү деп табылган Владимир Путинди камакка алууга ордер берген. Ал азыр Батыш өлкөлөрүнө гана эмес, Рим статутуна кол койгон жакынкы коңшуларына, атүгүл Арменияга барса камакка алынышы мүмкүн.

Өзбекстан Рим статутун ратификациялай элек. Бул Гаага соту ордер чыгаргандан кийин Путиндин Өзбекстанга жасаган биринчи сапары. Ал Өзбекстанга акыркы жолу 2022-жылы сентябрда – ШКУга мүчө-мамлекеттердин башчыларынын кеңешинин жыйынына катышуу үчүн барган.

Ал долбоордо өзгөрүүлөр болгонун, "жашыл экономиканын" шартына ылайык салынарын билдирди. Бийлик буга чейин долбоорго түштүк кореялык компания инвестиция саларын билдирген, бирок ал ишкана тууралуу кеңири маалымат бере элек.

"Жаңы шаардын курулушу башталат"

Президент Садыр Жапаров 25-майда Балыкчы шаарындагы сапарында "Асман" шаарын курууга катышууну каалаган инвесторлордун сунушу менен долбоорго өзгөрүү кирип, экологиялык кызыкчылыктарга басым жасалганын белгиледи.

“Былтыр капсула салгандан кийин аны көргөн чет өлкөлүк өнөктөштөр “жөн эле эмес, жашыл шаар салалы” деген сунуштарды берип, мурдагы долбоорго өзгөрүүлөр кирип, курулуштун башталышы бүгүнкү күнгө чейин созулуп келди. Дүйнөлүк коомчулук жашыл экономикага, жашыл энергетикага жана жашыл шаарга өтүүгө аракет кылып жатат. Мындан тышкары шаар Ысык-Көлгө зыянын тийгизбеши үчүн заманбап шаар куруу сунушун кабыл алып, жашыл шаарды баштап жатабыз”, - деди ал.

Дагы караңыз

"Сазга айланып кетиши мүмкүн". Ысык-Көл булганууда

Президенттин билдирүүсүндө “Асман” шаары үчүн бөлүнгөн жерге кайсы обьектилер курулары айтылган эмес. Азырынча бул стратегиялык долбоор тууралуу расмий маалымат жок, сайты да ишке киргизиле элек.

Мамлекеттик курулуш агенттигинин жетекчиси Нурдан Орунтаевге кайрылганыбызда азырынча толук маалымат берилбей турганын, курулуш башталгандан кийин баары белгилүү болорун “Азаттыкка” билдирди.

“Инвесторлордун да талаптары эске алынып, экологияны сактоо, экономиканы өнүктүрүүгө ылайыкташтырылган долбоор болду. Президентибиздин да багыты ушундай, биз да ошого жараша иш алып барабыз. Курулуш масштабдуу эле башталат, азыр шарттарды толук айта албайбыз. Курулуш башталганда баары белгилүү болот”, - деди Орунтаев.

Ысык-Көл жээгинде “Асман” шаарын куруу демилгеси алгач 2021-жылы айтылган. Ошол эле жылы Министрлер кабинетинин токтому менен “Асман” экологиялык таза шаарын куруу боюнча мамлекеттик дирекция” түзүлгөн. Былтыр 30-июнда президент Жапаров шаардын курулушуна капсула салып, иш ошол бойдон токтоп калган.

Президенттин иш башкармалыгынын башчысы Каныбек Туманбаев бул жагдайга түшүндүрмө берип, техникалык-экономикалык негиздеме жана керектүү документтер даярдалып жатканын, май айында инфратүзүмдөрдүн курулушу башталарын айткан.

Алдын ала эсептөөлөр боюнча Асман шаары 500 миң кишиге ылайыкталат деп айтылган.

Экономист Эрлан Камалов долбоорду “жашыл экономикага” ыктап ишке ашыруу пайдалуу деген ою менен бөлүштү:

“Өкмөттүн жаңы технологияларга жана жашыл экономикага негизделген шаарды курабыз дегени колдоого аларлык. Анткени мамлекет үчүн керек болуп жаткан каражат жана четтен келе турган каражаттар жашыл экономикага, климаттын өзгөрүшүнө каршы тура турган долбоорлорго жана ошол тармакка ыктаган өлкөлөргө артыкчылык берилип жатат. Мамлекет башчысы да ушул мүмкүнчүлүктү пайдаланып калгысы келип жатат деп ойлойм. Бул шаардын курулушунда жумушчу орун түзүлөт, жаңы калаа пайда болот. Эгерде долбоор чын эле "жашыл экономика" принциптерине негизделсе, шаар алдыңкы технологияны өзүнө камтыйт жана инвесторлорду өзүнө тартат”.

Экологдордун кооптонуусу, бийликтин жообу

Бир катар экологдор жана урбанисттер суу агып чыкпаган уникалдуу көлдүн жээгине мындай калаа куруу өтө дыкат эсептөөлөрдү талап кыларын, антпесе Ысык-Көлдүн суусу булганып, сазга айланып кетет деп эскертип келет.

Эко-активист Влад Ушаков көлдүн айланасында ансыз деле экологиялык көйгөй курч экенин айтып жатат:

“Жер жүзүндө бир дагы “экошаар” деген жок. Анткени экология менен шаар куруу “туздалган кумшекер” же “кара кар” дегендей эле бири-бирине каршы келген түшүнүктөр. Ар бир шаар антропоген, анда кандай гана заманбап технологиялар колдонулбасын, баары бир экологияга күч келет. Калктуу конушту кой, жөн эле пансионат куруу да экологияга жана айлана-чөйрөгө тобокелдикти пайда кыла берет. Караколдо, Чолпон-Атада тазалоо системалары өтө кейиштүү абалда. Мындан сырткары көлдүн жээгинде жайгашып, бирок канализациясы болбогон калктуу конуштар да бар. Менимче, алгач азыр байкалган көйгөйлөрдү чечип алган соң жаңы долбоорлорду ишке ашыруу керек”.

Дагы караңыз

Президенттик үч жыл: Садыр Жапаровдун экономикалык саясаты

Бийлик экологиялык талаптар сакталат деп ишендирүүдө. Министрлер кабинети адатта мындай чочулоолорго "Ысык-Көлдүн экологиясын коргоо жаатында иш алып барып жатабыз" деп жооп кайтарат. Өкмөт көл жээгиндеги мыйзамсыз курулуштар сүрдүрүлүп, эс алуучу жайлардагы тазалоо системаларга көзөмөл күчөтүлгөнүн буга чейин билдирген.

Инвесторлор кимдер?

Президент Жапаров "Асмандын" курулушу тууралуу билдирүүсүндө чет элдик өнөктөштөр тууралуу айтып, бирок долбоорду кайсы компания ишке ашырарын тактаган жок.

Экономика министрлигинин маалыматына караганда, "Асман" шаарынын курулушунун баасы 20 млрд доллар деп эсептелген. Аны курууга түштүккореялык компания 1 миллиард доллар инвестиция салууга ынтызарлыгын билдиргени расмий айтылган.

Ошентип түштүк кореялык бул компания кандай аталат, шаар куруу тармагында тажрыйбасы барбы деген суроолорго азырынча жооп табыла элек.

Инвестиция агенттигинин мурдагы жетекчиси Шумкарбек Адилбек уулу “Асман” шаарын пландоодо сөз болуп жаткан артыкчылыктарды камтуу боюнча терең талдоолор жана концепция каралган эмес деген ойдо:

"Долбоорду баштоодон мурда анын концепциясын ачык көрсөткөн билдирүү, маалымат болгон жок. Бул шаар эмне үчүн курулуп жатат дегенге анык жооп жок. Туристтик багытта дей турган болсок, Чолпон-Ата, Балыкчы жана башка шаарлар бар. Ошол жерлердин инфраструктурасын жакшыртып, деңгээлин көтөрсөк болмок. Дагы бир өзгөчөлүк катары “акылдуу шаар” айтылды. Ал үчүн ошол аймакта жер астындагы шарттардан баштап, бардык катмары изилденип, экологияга зыян келтирбей тургандай шаар болушу керек. Ошол өңүттөн алганда азыр тандалып алынган жерди “акылдуу шаар” деп айтуу кыйын. Электрондук сооданын логистикалык аймагы болот деген сөздөр айтылды. Ал үчүн инфратүзүм керек, ал жерге каттоо ыңгайлуу болуп, мындай шаар жок дегенде эки-үч мамлекетти бириктирип, бизнеске жол ача тургандай болуусу шарт. Мамлекет муктаж болгон долбоорлорду ишке ашырышы керек. Бизге азыр жаңы шаар керекпи? Эмне үчүн? Ал курулгандан кийин өзүн актайбы? Ушул суроолорго так жооп болсо, ишке ашырса болот. Азыркы кырдаалда инфраструктура, логистика, кайра иштетүү сыяктуу маанилүү долбоорлорго муктаждык көп".

Өкмөт Кыргызстандын экономикасы өнүгүүгө багыт алганын билдирген. Министрлер кабинетинин төрагасы Акылбек Жапаров 23-майда Бишкекте өткөн эл аралык финансылык форумда экономика туруктуу өнүгүү багытына чыкканын, жаңы ишканалар эле эмес, бүтүндөй тармактар менен багыттар ачылып, тышкы сооданын көлөмү өсүп баратканын айткан.

Дагы караңыз

Инвесторду үркүткөн алдамчылык жана опуза

"Асман" кайсы жерге салынат?

“Асман” кыргыз бийлигинин сөз кылган алгачкы “жашыл долбоору” эмес. Өлкөдө 2018-жылдан тарта “Кыргызстан – жашыл экономиканын өлкөсү” деп аталган концепция иштеген. Президент Жапаров 2023-жылдын башында Кыргызстанга карыз берген каржы институттарына жана өлкөлөргө кайрылып, тышкы карызды төлөөнүн ордуна “жашыл” долбоорлорду ишке ашыруу сунушун берген.

Жаңы шаар Чырпыкты жана Тору-Айгыр айылдарынын ортосунда, көл жээгине курула турган болууда. Ал жердин жалпы аянты 4015 гектар. Бишкектен 200 чакырым алыстыкта жайгашкан жер көлдүн жээгин, тоо этектеген жайытты жана алма-өрүк өстүрүлүп, өздөштүрүлгөн жерлерди камтыйт.