3-майда президенттин милдетин аткаруучу, премьер -министр Курманбек Бакиев иш сапары менен Жалалабат облусунун Аксы жана Алабука райондорунда болду. Аксы районунда 2002-жылдын 17-мартында алты адам курман болгон жерге барып, алардын арбагына таазим этип, 24-марттагы элдик төңкөрүш Аксыдан башталганын белгиледи. Райондун борбордук аянтында үч миңден ашуун адам менен жолугушуп, өкмөттүн азыр жүргүзүп жаткан иштерине токтолуу менен чек ара, миграция, бажы, коррупция, жер-жерлердеги кызмат талашуу, казыналык мекемелерде иштеген кызматкерлердин айлык акыларын көтөрүү маселелерин козгоду.
