"Азаттыктын" Бишкектеги бюросунун кызматкери, журналист, педагог-режиссер.
Бишкек шаар башчысы Данияр Үсөнов кечээ (8-апрелде) Ош базарынын --> http://www.azattyk.org/rubrics/economics/ky/2007/05/4a2ed629-2f63-4e8c-a05f-a3de29710bef.asp учурдагы абалы менен таанышып, ал жердеги 78 жеке менчик ээси менен жолугушуп, аталган базарды иретке келтирүү талабын койду. Базардагы жеке менчик ээлери болсо шаар бийлиги тарабынан айтылган сунуш-пикирлер орто жолдо калбай натыйжалуу ишке ашырылса, базарлар иретке келерин белгилешти. Айрым ишкерлер базардагы күнүмдүк оокатын өткөрүп атышкан миңдеген карапайым элге дагы шаар бийлиги шарт түзүп берүүсү зарыл деп эсептейт.
Кыргызстандын экономикасы оор абалда, деп билдирди “Ар намыс” партиясынынын лидери Феликс Кулов бүгүн маалымат жыйынында. Анын айтымында, 29-мартта Элдик курултайда өлкөнү экономикалык кризистен чыгаруу жолдору сунушталат. Ал ошондой эле саясий-экономикалык кырдаалга жана адам укугуна байланыштуу маселелерге токтолду. Экономикалык өнүгүү жана соода министри Акылбек Жапаров болсо кийнки үч жыл аралыгында Кыргызстандын экономикасы кыйла өсүп, республиканын бюджети эки эсе көбөйгөнүн байма-бай айтып келет.
“Акыйкат үчүн” коомдук кыймылы алдыда болуучу Элдик Курултайга --> http://www.azattyk.kg/rubrics/politics/ky/2008/03/574E04B1-35D6-438C-BD98-3FAFC063D2D3.asp бийлик тарабынан канчалык кысым көрсөтүлбөсүн баары бир өткөрө тургандыктарын 24-мартта координациялык кеңештин жыйынында белгилешти. Отурумда Элдик курултайда күн тартибинде каралуучу маселелер жана ага келүүчү делегаттардын тизмелерине тактоо киргизүү сыяктуу уюштуруу иш чаралары каралды. Ал эми адилет министри Марат Кайыпов курултайды өткөрүү тартиби тууралуу мыйзам кабыл алынгандан кийин гана курултай өткөрүүгө жол ачылат деген пикирде.
Коомдук жана саясий ишмер Дастан Сарыгулов 24-март --> http://rfe.azattyk.org/rubrics/politics/ky/2008/03/2856B8E2-B3D8-4430-8573-21DAFAC3E6D8.asp ыңкылабына сереп салып, бул күндү төңкөрүш дегендерди калың элди кыдырбаган, калк турмушунан кабары жок адамдардын пикири катары кабылдарын билдирди. Анын айтымында, чынында эле элдик ыңкылап болду, бирок ал өз мүдөөсүнө жетпей калды.
“Мен ишенбейм” кыймылынын мүчөлөрү Жогорку Кеңештин алдында 17-мартта “Саясий зоопарк” деген акция өткөрүштү. Аларды Биринчи май райондук милиция кызматкерлери кармап кетип административдик айып такты. Ошондой эле “Ар намыс” партиясынын жаш канаты "Абийир" коомдук декларациясын президент баш болгон мамлекеттик кызматкерлерге жолдоду. Ал эми “Акыйкат үчүн” коомдук кыймылдын кечээги күнкү отурумунда Коомдук парламенттин күн тартиби жана Элдик курултайды уюштуруу маселеси каралды.
Жакын арада Кыргызстан санарип ыкмасына өтсө, массалык маалымат айдыңында чет элдик маалымат каражаттары үстөмдүк кылып кетүү коркунучу бар. Бул тууралуу медиа өкүл Шамарал Майчиев “Азаттыкка” билдирди. Анын айтымында, учурда замандын талабына жараша жергиликтүү журналисттердин кесиптик деңгээлин эл аралык стандартка көтөрүү зарылчылыгы келип чыкты. Ал эми УТРКнын кызматкери Рахат Сулайманов республикада эл аралык деңгээлге көтөрүлүп калган журналисттер бар экенин, бирок техникалык жактан али чечилбеген маселелер аз эместигин белгиледи.
Элдик курултайды өткөрүү боюнча штаб түзүлүп, уюштуруу комитети ишке киришти. Бул тууралуу билдирген “Акыйкат үчүн” кыймылынын координациялык кеңешинин төрагасы Аликбек Жекшенкуловдун маалыматына караганда 29-мартта өтүүчү элдик курултайга чейин өлкөнүн жети дубанында жыйындар өткөрүлүп, курултайга делегаттар шайланат. Кыргызстан коммунисттик партиясынын лидери Клара Ажыбекова болсо элдик курултайда көтөрүлүүчү маселелерди колдоорун, бирок аны уюштуруучуларга ишенбестигин билдирди.
Кыргызстандагы айрым байкоочулардын пикиринде Орусиядагы президенттик шайлоодо административдик ресурстар ачыктан-ачык колдонулуп, мурдагы Совет биримдигиндегидей болуп шайлоо анык демократиялык негизде өткөн жок. Ал эми айрым саясатчылар болсо ушул тапта Орусияга Путиндин саясатын улантуучу мураскердин бийликке келиши Орусиянын биримдиги үчүн зарыл деген көз карашта.
29-мартта Бишкекте жалпы элдик курултай өткөрүлөөрү белгиленди. Бул тууралуу бүгүн “Акыйкат үчүн” кыймылдын координациялык кеңешинин жыйынында айтылды. Ошондой эле 19-мартта болуучу Коомдук парламенттин --> http://rfe.azattyk.org/rubrics/politics/ky/2008/02/4DF03953-5BDB-4FBF-90B8-15DB23D99334.asp экинчи отурумунун күн тартиби бекитилди. Айрым бийлик өкүлдөрү, саясатчылар Коомдук парламентти укуктук жактан мыйзамга туура келбестигин айтып, сын көз менен карашууда.
Белгилүү кинорежиссер Болот Шамшиевдин мурдагы зайыбы Асел Айнидинова ага карата Шамшиевдин куугунтугун жана укук коргоо органдары тарабынан козголгон кылмыш ишин токтотууну өтүнүп кыргыз бийлигине кайрылды. Анын билдирүүсүн коомчулукка жарыялаган Айнидинованын апасы Жамалкан Эгембаеванын айтымында, Шамшиев президенттин кеңешчиси кызматынан пайдаланып кызына жана ага кысым көрсөтүп жалган айып тагууда. Ал эми белгилүү кинорежиссер болсо дачаны кайын журту менен мурдагы келинчеги өрттөдү деп эсептеп, бардыгы мыйзам алдында бирдей жооп бериш керектигин белгиледи.
Кыргыз-казак чек арасынын делимитациясы 1930-жылдагы документ жана 1961-жылдагы Кыргыз Республикасынын Жогорку Кеңешинин жарлыгынын негизинде жүргүзүлдү, деп билдирди өкмөттүн аппаратынын аймактык проблемалар боюнча бөлүм башчы Саламат Аламанов. Анын айтымында, бул маселе боюнча айрым саясатчылар коомчулук арасында туура эмес маалыматтарды тараткандыктан, 2003-жылы мурдагы парламент бекитпей койгон. Мурдагы депутат Азимбек Бекназаров болсо чек ара маселесинде кыргыз тараптын кызыкчылыгы сакталбай калган деп сынга алууда.
Айрым саясатчылар парламент Борбордук шайлоо комиссиясынын алты мүчөсүн “Ак жол” партиясынан шайлаганына кайчы пикирлерин билдиришүүдө. Алар БШКнын курамынын көпчүлүгү бир партиядан түзүлгөнүн жана мамлекеттик кызмат иштери боюнча кеңештин төрагасы менен мүчөлөрү да “Ак жол” партиясынан көрсөтүлүшүн мурдагы Советтик режимге кайрылуу катары эсептешүүдө. Мындай пикирге “Ак жол” партиясынын парламенттеги депутаты Кубанычбек Исабеков макул эмес. Анын айтымында, дүйнөлүк тажрыйбада шайлоодо жеңишке жетишкен партиялар өздөрүнүн өкүлдөрүн бийлик органдарына дайындайт.
Бүгүн “Кыргызстан” деген аталыштагы революциялык комитет алгачкы отурумун өткөрдү. Маалыматка караганда анда алдыдагы иштердин пландары жана март айында өткөрүлүүчү коомдук иш чара жөнүндө маселе козголду. Ревкомдун демилгечилеринин бири Азимбек Бекназаров жыйында каралган маселелер жашыруун экенин айтып, толук маалымат берүүдөн баш тартты. Айрым талдоочулар ревкомдун жарым- жартылай жашыруун иш-аракетин мурдагы орус падышалыгына каршы чыккан большевиктик партиясы менен салыштырууда.
Оппозициялык «Ар намыс» партиясы бүгүн билдирүү таратып, 16-декабрдагы парламенттик шайлоонун расмий жыйынтыгы толук жарыялана электигин белгилеп, бул саясий партиялардын укугун чектеп, мыйзамга каршы келерин эскертти. Буга чейин парламенттик шайлоого катышкан оппозициялык партиялар жана жарандык уюмдардын жоон тобу БШК шайлоону бир партиянын кызыкчылыгы үчүн бурмалап өткөрдү деп, шайлоо тыянактарын тааныбай тургандарын жарыялашкан болчу. БШКнын басма сөз кызматы «Ар намыс» партиясынын акыркы билдирүүсүн төгүндөп, шайлоо тыянагы «Эркин тоо» гезитине жарыяланганын маалымдады.
Бүгүн өлкө башчысы Курманбек Бакиев облустун губернаторлору менен жолугушуп, алар жетектеген аймактарда социалдык-экономикалык жактан өнүктүрүү программасын иштеп чыгып, аны жүзөгө ашыруу милдетин койду. Ошондой эле облус башчыларын жана район акимдерин эл менен байма-бай жолугушуп, көйгөйлүү маселелерди жеринде чечүүнү талап кылды. Айрым талдоочулар туруктуу кадр саясаты болбосо президенттин койгон талаптары “суу кечпейт” деген көз карашта.
Укук коргоочулар адилет министри Марат Кайыпов менен жолугушуп тынч митинг, пикеттерди чектөө жана адам укуктарына байланыштуу маселени талкуулашты. Өз сөзүндө Кайыпов атуулдардын Конституцияда жазылган укуктарын коргоого, сактоого бийлик кепил болоорун, алардын укугу капыстан бузулса калыбына келтиргенге мамлекет укук коргоочулар менен бирге иш алып барарын белгиледи. Укук коргоочу Азиза Абдырасулова министр Кайыпов менен жолугушуу негизинен майнаптуу болгондугун белгилеп, бирок анын Бишкек шаардык кеңешинин тынч жыйындарды чектеген токтомун жокко чыгарууга кудурети жетпей тургандыгын билдирди.
Бүгүн бир катар бейөкмөт уюмдун өкүлдөрү Адилет министрлигинин алдына пикетке чыгышып, министр Кайыповду мыйзам бузууларга жол берип, адам укугун басмырлоого тилектеш болууда деп айыпташты. Министрдин орун басары Бекболот Бекиев болсо укук коргоочулардын Марат Кайыповдун дарегине карата айтылган дооматтарында эч кандай негиз жок деп эсептейт.
Атуулдардын тынч митинг өткөрүү укугун кайрадан кайтарып берүү боюнча токтоосуз чара көрүүсүн өтүнүп бир катар бейөкмөт уюмдар бүгүн президент Курманбек Бакиевге кайрылуу жолдошту. Анда Бишкек шаардык кеңештин митинг, пикеттерди чектөө жөнүндөгү токтому Конституцияга каршы келип, карапайым жарандар менен милиция кызматкерлеринин ортосунда жасалма карама-каршылыкты түзгөндүгү айтылат. Ошондой эле тегерек үстөл жыйынында пикет, тынч жыйындарды өткөргөндөргө тартип коргоо кызматтарынын мыйзамсыз аракеттери сынга алынды. Конституциялык саясат боюнча институттун директору Нурлан Сыдыков бул маселе боюнча Жогорку Кеңеш жоопкерчиликти алып жаңы мыйзамдарды кабыл алыш керек деп эсептейт.
Кыргызстанда президент К. Бакиевди кызматынан мөөнөтүнөн мурда кетирүү максатында революциялык комитет түзүлдү. Ревком 24-марттагы ыңкылаптын, жалпы элдин үмүтүн актабаган президент катары Курманбек Бакиевди мөөнөтүнөн мурда кетирүү үчүн саясий күрөш баштап жатканын “Асаба” партиясынын жетекчиси Азимбек Бекназаров бүгүн жарыялады. Анын айтымында, ревкомду бир катар саясий партиялар, саясатчылар колдоодо, бирок коопсуздук үчүн алардын аты-жөнү, ревкомдун мүчөлөрү, дареги коомчулукка жарыяланбайт. Президенттин басма сөз кызматынын жетекчиси Досалы Эсеналиев болсо мындай билдирүүнү таратууга эч кандай негиз жок деп эсептейт.
12-январда президент Курманбек Бакиев Ысыккөлдүн жээгинде 30 га.аянтка «Президенттин резиденциясын куруу жана долбоорлоо иш чарасын бөлүштүрүү» жардыгына кол койгон. Президенттин иш башкармалыгынан учурда бул боюнча сүйлөшүүлөр кагаз жүзүндө иштер жүргүзүлүп жатканын маалымдашты. Айрым талдоочулар экономикалык абал кыйың кезде жаңы резиденцияны куруунун кажети жок экендигин, биринчи кезекте айыл-чарбасына көңүл буруп, дан азыктарына байланыштуу проблеманы чечүү зарылдыгын айтышууда.
Дагы жүктөңүз
