Израил 21-февралдан тартып өз экономикасынын бир катар тармагын жандантты. Өкмөттүн айтымында, кадыресе режимге кайтып келүү “COVID-19” илдетине каршы эмдөө жүрүмүнүн өлкөдөгү калктын дээрлик жарымын камтыганга жетишүүсүнүн аркасында ишке ашты.
21-февралдан тартып Израилдеги дүкөндөр бардык тургундарга ачылды. Бирок спорт залдар, мейманканалар жана театрлар сыяктуу эс алуу жайларына вакцинанын эки дозасы менен бир жумадан ашуун убакыт мурда эмделгендер же коронавирустан айыгып, иммунитети пайда болду делген кишилер гана кире алышат.
Бул топтордогу кишилер өлкөнүн Саламаттык сактоо министрлигинин интернеттеги тиркемесинде жарыяланган "Жашыл паспорт" макамына ээ болушат.
Израилде, бирок, беткап тагынуу жана социалдык аралыкты кармоо эрежелери мындан кийин деле күчүндө кала бермекчи. Банкет залдарында бийлөөгө тыюу салынган.
Синагогалар, мечиттер же чиркөөлөр өз жамааттарын демейдеги жыйналгандагы көлөмдөн эки эсе азайтууга милдеттүү.
Коронавируска байланыштуу карантин эрежелерине каршы чыккан эскичил динчил жөөт тобунун өкүлдөрү менен полициянын тирешүүсү маалы. Ашдод шаары, Израил. 2021-жылдын 24-январы.
Израилдеги коронавирустун биринчи даректешкен учурунан туура бир жыл өткөндөн кийин, дал ушул жекшемби күнкү карантиндик ооздуктоолорду жеңилдетүүнүн саясий орду да бар экендиги айтылууда: премьер-министр Биньямин Нетаньяху келээрки айдагы кайрадан шайлоого даярданып жатат. Март айында өлкө экономикасы мындан да кеңири ачылаарын өкмөт пландоодо.
"Биз алып келген миллиондогон вакциналардын көмөгү менен өлкөбүз өзүн-өзү жандандырып жаткан дүйнөдөгү биринчи өлкө болуп калды", – деп Нетаньяху “Твиттереги” барагында жазды. – "Эмделдиңизби? Анда Сиз “Жашыл паспортко” ээ болуңуз да, демейдеги жашоого кайтып келиңиз".
Prime Minister Benjamin Netanyahu and Health Minister Yuli Edelstein visited a gym in Petah Tikva, ahead of the opening of the sector tomorrow via the Green Pass program."The Green Pass is gradually opening the country. Please, use it. It is for you."https://t.co/AEXb3hN2pu pic.twitter.com/VWA3Ctf8mM
— PM of Israel (@IsraeliPM) February 20, 2021
Ал эми өзүнүн өкмөт башчы катары расмий “Твиттер” барагында Нетаньяху мырза саламаттык сактоо министри Юлий Эдельштейн менен чогуу Петах Тиква шаарындагы бир спорт залга 20-февралда башпагып, жекшембиден тартып бул зал “Жашыл паспорт” программасынын шарттарына ылайык ачыла тургандыгын айтканы чагылдырылды:
– "Жашыл паспорт” эми акырындык менен өлкөнү ачып жатат. Байболгурлар, бул программаны колдонуңуздар. Ал – Сиздер үчүн, – деди Израилдин өкмөт башчысы.
“Рөйтерс” кабар агенттигинин маалымдашынча, Израил бийлиги 9 миллион калкынын 46%дан ашуун бөлүгүн Pfizer-BioNTech компаниясынын COVID-19 вакцинасынын жок дегенде бир дозасы менен эмдегендигин өлкөнүн Саламаттык сактоо министрлиги билдирди.
COVID-19 илдетинин коркунучу вакцинанын эки түрүн тең алган адамдардын арасында 95,8%га төмөндөгөнүн Саламаттык сактоо министрлиги 20-февралда билдирди.
Дагы караңыз Израил бардык авиакаттамдарды бир аптага токтотот
Өлкөдө коронавируска чалдыгуу боюнча 744 миңден ашык учурлар катталып, 5526 киши бул оорудан улам каза болушкан. 21-февралдын таңындагы маалыматка караганда, бул өлкөдө акыркы күн-түнү коронавирус менен байланыштуу жаңы оорулуу катталган эмес.
Кээде Нетаньяхунун өкмөтү үч жолу карантин киргизгендиги үчүн сынга да алынып келген. Айрым эскичилдер дагы эле карантин шарттарына каршы нааразылык билдирип келишет. Өкмөт эми төртүнчү ирет жалпы карантин киргизүү чарасы болбойт деп убада берди.
Дагы караңыз Иудейлер жана таажы вирусу: Сабатсыздар ар динде бар
Бирок өлкөнүн пандемияга каршы күрөшүү боюнча жооптуу дарыгери Нахман Эш “Армия” үналгысына курган маегинде карантин дагы бир жолу "киргизилип калышы ажеп эмес... Калктын жарымы дагы деле иммунитетке ээ эмес да", – деп ачык айтты.
Иерусалим (Куддус) шаарына кар жаады. 2021-жылдын 18-февралы.
Орто мектептердин башталгыч класстарынын жана эң жогорку эки классынын окуучулары тазалык эрежелерин сактоо шарты менен сабакка бара башташты. Башка класстардын окууулары келээрки айдан тартып сабакка келүүгө уруксат алышат. Алар дээрлик бир жыл бою сабакка аралыкта онлайн тартибинде окуп келишти.
Тасма. Карантинди киргизүү аракеттери маалы. Израиль. 2020-жылдын 7-апрели.
Коронавирус алааматы башталган чакта, жөөттөрдүн айрым эскичил диний топторунун өкүлдөрү өкмөттүн карантин чараларына каршы чыгып, ал тургай карантиндин эрежелерин күчтөп киргизип жаткан полиция жана аскерлер менен кагылышууга чейин барганы маалым.
Эми болсо Израил дүйнөдөгү коронавируска каршы иштиктүү чаралар көргөн өрнөктүү өлкөлөрдүн алдыңкы сабына чыкты жана анын тажрыйбасын дүйнө коомчулугу кылдат үйрөнүүдө.
Израил быйыл марттын аягына чейин 16 жаштан жогорку курактагы бардык жарандарга коронавируска каршы эмдөө жүргүзүүнү аяктоону көздөп жатат. Бул натыйжа тарыхый бурулуш учурду көрсөтүүгө тийиш. Төгөрөктүн төрт бурчундагы башка өлкөлөрдүн бийликтери да пандемиянын алааматын жеңүү үчүн кандай саясат жүргүзүү алгылыктуу экендигин талдоо үчүн үлгүгө ээ болушат.