Социал-демократтар партиясынын камактагы лидери Темирлан Султанбеков Улуттук коопсуздук боюнча мамлекеттик комитеттин (УКМК) төрагасы Камчыбек Ташиевдин ал тууралуу Жогорку Кеңештин жыйынында айткан сөзүнө кат менен жооп берди. Анын Бишкектеги №1 тергөө абагынан жазган каты 12-декабрда Фейсбуктагы баракчасына жарыяланды.
Султанбеков анда Кыргызстанда биринчи жолу саясий партия шайлоонун алдында жарыштан четтетилип, лидери камакка алынганын, муну менен бийлик алсыздыгын көрсөткөнүн жазган.
“Сиз кечээ мени саясий негизде каматканыңызды эл алдында моюнга алганыңыз үчүн чын жүрөктөн ыраазычылык билдиргим келет. “Султанбеков мамлекетти башкаргысы келип жатат” деп ачык эле айттыңыз, бирок добуш сатып алуу боюнча бир ооз сөз сүйлөгөн жоксуз. Мен “мамлекетти башкарам” деп Ак үйдү басып алууга аракет кылып, тосмодон ашып түшүп шымымды айрып алган эмесмин. Мен ар дайым мыйзам чегинде гана аракет кылам жана сиздерди да ошого чакырам”, - деп жазылган катта.
Камчыбек Ташиев парламенттин 11-декабрдагы жыйынында депутат Сеидбек Атамбаевдин суроосуна жооп берип жатып, Темирлан Султанбеков мыйзам алдында жооп бериши керектигин билдирген.
“Султанбеков менен эрегишпесек, жаш бала болсо, жаш баладай өзүн алып жүрсүн. Ал мамлекетти башкаргысы келип жатат. “Эгер мамлекетти башкара албасаңар мага бергиле” дейт. Ал үчүн өсүшү керек. Ага чейин мыйзам алдында жооп берсин”, - деген Камчыбек Ташиев.
Бишкектин Свердлов райондук соту 15-ноябрда Темирлан Султанбековду, Социал-демократтар партиясынын мүчөлөрү Ирина Карамушкинаны жана Роза Түрксеверди эки айга камакка алган. Бишкек шаардык соту 2-декабрда аларды камакта калтырган.
Шектүүлөргө Бишкек шаардык милициясы 14-ноябрда Кылмыш-жаза кодексинин “Шайлоочулардын добуштарын сатып алуу” беренеси боюнча кылмыш ишин козгогон. Алар коюлган айыпты четке кагып, муну саясий басым-кысым деп баалап жатат.
Султанбеков абакта ачкачылык жарыялаганына 30 күнгө чукулдап калды. Ал суу, шире (сок) гана ичип жатканын адвокаттары, жакындары билдирүүдө.
Бишкек аймактык шайлоо комиссиясы козголгон кылмыш ишин жана тергөөнүн маалыматтарына таянып Социал-демократтар партиясын Бишкек шаардык кеңешине шайлоого катышуудан четтеткен. (BTo)
Дагы караңыз
Румыния жана Болгария Шенген мейкиндигине толук кошулдуТүштүк Кореянын президенти Юн Сок Ёль кутум тууралуу айыптоону четке кактыЖаңы жылдан тартып марка коюлбаган күйүүчү майды сатууга тыюу салынатПарламент дин боюнча мыйзам долбоорун биринчи окууда колдодуRSF: Быйыл дүйнөдө 54 журналист кесибине байланыштуу каза таптыИИМ: Бишкекте эки кишиге кол салгандар жабырлануучулардын 31 млн рублин тартып алышканГимнди өзгөртүү боюнча мекемелер аралык комиссияга сегиз депутат кирди