Кыргызстандын президенти Садыр Жапаров 24-ноябрда расмий сапар менен Австриянын баш калаасы Венага жөнөп кетти. Президенттин басма сөз кызматы жекшемби күнү билдиргендей, Жапаров Венада Австриянын федералдык президенти Александер Ван дер Беллен, федералдык канцлер Карл Нехаммер, ошондой эле Австриянын Улуттук кеңешинин төрагасы Вальтер Розенкранц менен эки тараптуу сүйлөшүүлөрү өткөрөт.
Бул Садыр Жапаровдун президент катары Борбордук Европадагы бул өлкөгө жасаган биринчи расмий сапары. Анын алкагында Австрия менен Кыргызстандын кызматташтыгын "мындан ары кеңейтүү пландары" талкуулана турганы расмий билдирүүдө айтылат. Венада Австрия менен кандай келишимдерге кол коюлары расмий кабарланган жок.
Июнь айында Кыргызстандын Министрлер кабинетинин төрагасы Акылбек Жапаров Австрияга иш сапары менен барып келген. Ал Венада Камбар-Ата ГЭС-1ди куруу долбоорун талкуулаган Эл аралык энергетикалык инвестициялык форумга катышкан. Кыргыз өкмөтү Дүйнөлүк банк тобунун колдоосу жана Австрия өкмөтүнүн көмөгү менен уюштурган бул форумда аталган ГЭСти куруу боюнча Координациялык донордук комитет түзүлгөнү кабарланган.
30-октябрда Венада Кыргызстан менен Австриянын экономикалык байланыштары боюнча биргелешкен комиссиянын жыйыны да өткөн. Анда тараптар өз ара товар жүгүртүүнү жана Австриядан түз инвестицияны көбөйтүү жолдорун талкуулашкан.
