Кыргызстандын АКШдагы элчиси Бактыбек Аманбаев менен Өзбекстандагы элчи Муса Жаманбаев кызматтан бошотулду. Бул тууралуу жарлыкка президент Садыр Жапаров кол койгону 25-октябрда мамлекет башчынын сайтына жарыяланды.
Бактыбек Аманбаев бул кызматка 2021-жылы апрелде дайындалган. 2020-жылдагы парламенттик шайлоого "Мекенчил" партиясынан талапкер болгон. Ошол жылдын октябрындагы бийлик алмашуудан кийин 2021-жылы февралга чейин өкмөттүн аппаратын жетектеген. 2013-2015-жылдары Кыргызстандын акыйкатчысы болуп иштеген.
Муса Жаманбаев 2022-жылдын апрелинен бери Кыргызстандын Өзбекстандагы элчиси кызматын ээлеп турду. Ага чейин президенттик администрациянын Протокол кызматынын жетекчиси болгон.
Азырынча Вашингтонго жана Ташкентке элчи болуп кимдер дайындалары белгисиз.