Суу ресурстары, айыл чарба жана кайра иштетүү өнөр жайы министрлиги “Азаттыктын” материалында дыйкандардын кулпунай жана малинанын баасы арзан болуп жатканы боюнча нааразылыгына жооп берди.
Министрликтин басма сөз кызматы 2-августта берген маалыматында мекеме Бишкек шаарынын мэриясы менен бирге дыйкандардын өстүргөн азык-түлүгүн сатуусуна көмөк көрсөтүлүп, борбор калаадан 23 соода жайы бөлүнүп берилгенин билдирди.
Бул жерлерден дыйкан-фермерлер түшүмдөрүн түздөн түз сатууга мүмкүнчүлүк алышат.
Анда “Ош”, “Дордой Моторс”, “Орто-Сай”, “Көк-Жар”, “Баят”, “Алдаяр” базарларында, “Глобус”, “Азия” гипермаркеттеринин айрым түйүндөрү жана бир катар чакан базарлар жана соода жайлары жазылган.
Мекеме дыйкандар Ленин району боюнча 0312 65-69-01, Октябрь району 0312 57-66-50, Биринчи Май району 0312 32-52-85, Свердлов району боюнча 0312 53-13-51, 0312 36-01-04 жана министрликтин өкүлү менен 0990-779770 номурлары аркылуу байланышса болорун билдирди.
"Азаттыктын" Instagram баракчасына жарыяланган видео материалда Чүйдүн Беловодское айылынын дыйкан-фермерлери малина жана кулпунай, жер-жемиштердин баасы арзан болуп, алардын мээнети акталбай жатканын айтып, президент Садыр Жапаровго кайрылуу жолдошкон.
Кыргызстанда дыйкандар өндүргөн азык-түлүктүн түрү арзан болуп, чыгымы акталбай калган учурлар утур-утур катталып келет. Былтыр Ысык-Көл менен Нарында картөшкөнүн түшүмү мол болгону менен баасы түшүп кеткен.