Бишкек шаардык соту 22-февралда Жогорку Кеңештеги “Бүтүн Кыргызстан” фракциясынын лидери Адахан Мадумаровду абакта калтырды. Анын адвокаттары саясатчынын бөгөт чарасын өзгөртүү боюнча апелляциялык арыз берип, сот аны канааттандырган жок.
Адахан Мадумаровго эки кылмыш иши козголуп, бир өндүрүшкө бириктирилген.
Биринчиси - Кыргыз-тажик чек арасындагы тилке боюнча 2009-жылы протоколго кол койгону үчүн ага “Мамлекеттик чыккынчылык” деген берене менен айып тагылууда. Президент Садыр Жапаров буга чейинки маектеринде ошол протоколдун айынан Баткендеги Төрт-Көчө талашы жаралып жатканын билдиргени бар. Адахан Мадумаров ал протоколдун юридикалык күчү жок экенин айтып келет.
Экинчиси - Чыңгыз Абдымомунов аттуу адам 2015-жылы “Бүтүн Кыргызстан” партиясына 50 миң доллар бергенин айтып, аны кайра кайтарып берүү өтүнүчү менен милицияга арыз жазган. Бул факты боюнча “Алдамчылык” беренеси менен кине коюлган.
Саясатчыны былтыр Бишкекте 2-сентябрда жашы жете элек уулун жетелеп жүргөн жеринен милициянын атайын даярдыктагы бөлүгүнүн кызматкерлери кармап кеткен. Ошондон бери Улуттук коопсуздук боюнча мамлекеттик комитеттин (УКМК) убактылуу кармоочу жайында жатат.
Адахан Мадумаров коюлган айыптарды четке кагып, мунун баарын саясий куугунтук деп сыпаттап келет.
Саясатчынын иши боюнча Биринчи Май райондук сотунда жумасына эки жолу соттук отурум өтүп жатат. Ушул күнгө чейин 40ка жакын адам күбө катары көрсөтмө берди. Алардын арасында азыркы жана мурдагы чиновниктер бар. (BTo)
Дагы караңыз
Ийгиликтүү иш баштоого үйрөткөн бестселлер кыргыз тилинде чыктыМинистр Ак-Сууда кар жиреп мектепке барган мугалимдерге ыраазылык билдирди Министрдин орун басары мамлекеттик сатып алуулар боюнча кармалдыTransparency International “чет өлкөлүк өкүл” мыйзамын кабыл албоого чакырды Парламент “чет элдик өкүл” мыйзам долбоорун экинчи окууда кабыл алдыДепутат Эрбаев “чет элдик өкүл” долбооруна автор болуудан баш тарттыКылмыш тобу Жалал-Абаддагы абактан 6,5 миллион сом жыйнаган