Жогорку Кеңештин депутаты Дастан Бекешов "Кумтөр Голд Компани" компаниясындагы коррупция, анын мурдагы убактылуу тышкы башкаруучусу Тенгиз Бөлтүрүктүн камалышы тууралуу кеңири маалымат берилиши керектигин билдирди. Ал парламенттин 14-сентябрдагы жыйынында бул маселени күн тартибине киргизип, талкуулоону сунуштады.
"Кыргызстан үчүн бир миллиард сом аз акча эмес. Кечээ биз медиадан "Кумтөрдө" бир миллиард сом зыян келтирилди деп окудук. Депутаттарда толук маалымат жок. Биз маалыматты жалпыга маалымдоо каражаттарынан окуп жатабыз, бирок көзөмөлдөө жагынан аксап жатабыз. Ошондуктан биз муну жөн эле калтырбай маалыматты уксак. Маалыматты уккандан кийин аны же комитет көзөмөлдөйбү же комиссия түзөбүзбү, бул жерде чечели. Муну жөн калтырып койсок коомчулукта ар кандай пикир болушу мүмкүн. Биз чоң маселени карабай жатабыз. Каржы институттарынан акча сурап жүрөбүз, ал эми ичибизден болсо 12,5 миллион долларды уурдап жатышат",-деди Бекешов.
Башкы прокуратура 13-сентябрда Бөлтүрүк "Кумтөрдөгү" коррупцияга байланыштуу камалганын билдирген.
Аны менен кошо жабдуу боюнча адис Айша-Гүл Фронтбек кызы Жаналиева, каржы башкармалыгынын директору Рыспек Токтогулов кармалып, Бишкек шаардык милициясынын убактылуу кармоочу жайына киргизилген.
Буга чейин Башкы прокуратура "Кумтөрдү" текшерүүдө, ишкананын кызмат адамдарынын коррупциялык схемасынын натыйжасында мамлекетке бир миллиард сомго жакын зыян келтирилгени аныкталганын маалымдаган.
25-августта Кумтөргө сырттан башкаруу токтотулуп, Тенгиз Бөлтүрүккө отчет берүү буйругу берилген. 23-августта Эсеп палатасынын тийиштүү текшерүүлөрүнө байланыштуу "Кумтөр" компаниясын буга чейин жетектеп келген Тенгиз Бөлтүрүк жана ишкананын финансылык директору Рыспек Токтогулов ээлеген кызматынан четтетилген.
Текшерүүнүн жыйынтыгында финансылык мыйзам бузуулар болгону, күйүүчү-майлоочу майлар, тамак-аш, тетиктер жогорку баада сатылып алынганы аныкталган.
Башкы прокуратура "Кумтөрдү" августта текшере баштаган. Учурда үч кылмыш иши козголгонун белгилүү болду.
"Центерра Голд" компаниясы башкарып келген Кумтөр кенин Кыргызстандын бийлиги 2021-жылдын май айында өз карамагына алган.
Кийин "Центерра Голд" компаниясынын директорлор кеңешинин мурдагы мүчөсү Тенгиз Бөлтүрүк "Кумтөр Голд Компани" ишканасына убактылуу сырттан башкаруучу болуп дайындалган.
2022-жылы февралда ишкананы убактылуу тышкы башкаруу укугу жаңы түзүлгөн "Улуу көчмөндөр мурасы" улуттук холдингине берилген. Ошол эле кезде Бөлтүрүк бул холдингдин жетекчиси бойдон калган.
Дагы караңыз
Баткен: кыргыз-тажик чек арасындагы Булак-Башы аймагында ок атылды Самаркандда ШКУга мүчө өлкөлөрдүн башчыларынын жыйыны өтөт Министр зордуктоого шектүүлөр Улуттук гвардиянын офицерлери экенин айтты Азери-армян чек арасындагы кырдаал: ЖККУ кезексиз жыйынга чогулду Лавров БУУнун Башкы ассамблеясынын жыйынына катышуу үчүн АКШга виза алды