Улуу Британиянын ханышасы Елизавета II тажыясына дүйнөнүн булуң-бурчунан 500гө жакын расмий өкүлдөр келет. DPA маалымат агенттиги Уайтхолл сарайындагы жеке булактарына таянып, ханышаны акыркы сапарга узатуу зыйнатына Орусиянын, Беларустун жана Мьянманын өлкө жетекчилерине чакыруу жөнөтүлбөгөнүн жазды. Ал эми Ирандан элчилердин деңгээлинде гана өкүл болот.
Кремлдин басма сөз кызматы өткөн аптада президент Владимир Путиндин ханышанын Лондондо өтө турган тажыясына катышуу планы жок экенин билдирген.
Акыркы сапарга узатуу зыйнатына чакырылгандардын көбү, анын ичинде АКШнын президенти Жо Байден, Франциянын президенти Эммануэл Макрон, Канаданын премьер-министри Жастин Трюдо жана Жаңы Зеландиянын премьер-министри Жасинда Ардерн келерин ырастады.
19-сентябрда Улуу Британияда 1965-жылы Уинстон Черчилл каза болгондон берки биринчи мамлекеттик деңгээлдеги тажыя өтөт. Коштошуу зыйнатынан кийин ханышанын сөөгү салынган табыт Виндзор сарайына алып келинип, ошол жактан жерге берилет.
Британ ханышасы Елизавета II Шотландиядагы падышалык жайкы резиденциядагы Балморал сарайында 8-сентябрда каза болгон.
96 жашында дүйнөдөн кайткан Елизавета II Британиянын тарыхында тактыда эң узак отурган жетекчи болуп калды. Ал өлкөнү 70 жыл башкарды.
Анын уулу Чарльз III Улуу Британиянын жаңы падышасы болгонун Мураскерлер кеңеши 10-сентябрда расмий жарыялаган.
Дагы караңыз
Лавров БУУнун Башкы ассамблеясынын жыйынына катышуу үчүн АКШга виза алдыКоргоо министринин жоокерлердин өлүмү жөнүндө маалыматы сынга кабылдыТенгиз Бөлтүрүк коррупцияга шек саналып камакка алындыАзербайжан менен Армениянын чек арасында ок атышуу болду Орусияда сот Гүлнара Каримованын алты батирин конфискация кылдыМосква Кытайдагы элчисин алмаштырдыДепутат зомбулуктан улам милиция кызматкерлерин кызматтан алууну сунуштады