"Кумтөр" иши боюнча сурак берүү үчүн Кыргызстанга келген Аскар Акаев бүгүн, 8-августта Москвага учуп кетти. Бул тууралуу “Азаттык” радиосуна мурдагы министр, Акаевдин санаалашы Бекболот Талгарбеков билдирди. Анын айтымында, эми Акаев каалаган учурда Кыргызстанга келе алат. Бирок качан кайтып келери белгисиз.
Буга чейин Акаев кыргызстандыктарга видео кайрылуу жасап, Кумтөр алтын кени үчүн келишимге барганына кечирим сураган. 16 жылдан кийин мекенине кайтып келишине аталган келишим боюнча сурак себеп болгонун ырастаган. Ал ошондой эле Кыргызстанды башкарып турган 15 жыл аралыгында бир катар жетишкендиктер менен катар кемчиликтер да орун алганын айтып, эң башкы кемчилиги катары - Аксы трагедиясы менен 2005-жылы президенттик кызматын Конституциялык жол менен өткөрүп бере албаганына өкүнүчүн билдирген.
Кыргызстанды 1990-жылдан 2005-жылга чейин башкарган Акаев 2005-жылы 24-мартта бийликтен кулатылып, үй-бүлөсү менен Кыргызстандан качып кеткен. Ал ушул жылдын 2-августунда Бишкекке келген.
Улуттук коопсуздук комитети (УКМК) мурдагы президент "Кумтөр" долбоору боюнча козголгон кылмыш ишинин алкагында Москвадан алып келингенин билдирсе, Акаев бийлик менен сүйлөшүп алып өз эрки менен келгенин айткан.
Акаев 1992-жылы "Кумтөр" долбоору боюнча башкы макулдашууну түзүү, ага 1994-жылы өзгөртүү киргизүү жана 2003-жылы "Камеко" компаниясы менен башкы макулдашууну реструктуризациялоодогу коррупцияга байланыштуу айыпталып жатат.(ZKo)
Дагы караңыз
Олимпиада: өзбекстандык мушкер Баходир Жалолов алтын медалга ээ болду Акаев Кумтөр боюнча катасын моюнга аларын айтып, элден кечирим сурадыТалибдер Кундуз провинциясынын көпчүлүк бөлүгүн ээлегени кабарландыКыргыз Эл артисти Искра Райымкулова дүйнөдөн кайттыМасадыков vs Ташиев: маектен чыккан талкуу"Коррупция илим тармагын да чырмап алды"