Кыргыз спортунун жаңы барагын ачкан балбандар
22 жаштагы Акжол Махмудов эгемендүү Кыргызстандын тарыхындагы Олимп оюндарында экинчи күмүш байгени утту.
Олимпиада грек-рим күрөшүнөн 77 килограмм салмакта медал уткан спортчулар: алтын медалды венгриялык Тамаш Лёринц, күмүштү кыргызстандык Акжол Махмудов, коло байгелерди жапониялык Шохей Якибу, азербайжандык Рафиг Хусейнов алышты.
Акжол Махмудов алтын байге үчүн айыгышкан кармашта Лондон Олимпиадасында күмүш байге уткан, 2019-жылдагы дүйнө чемпиону, Европанын төрт жолку чемпиону 34 жаштагы Тамаш Лёринцке бир упай айырмасы менен гана 1:2 эсебинде жеңилип калды.
“Экинчи болуп калдым, өзүм ойлогондой күрөшө алган жокмун. Эмнеге жөндөмдүү экенимди да көрсөтө албадым. Финалда бир аз алаксып, өзүмдү колго ала алган жокмун. Финал болобу, канчанчы беттеш болбосун утулуп калгандан кийин сезимдер канааттандырарлык боло албай жатат. Утулуп калганыма бир аз маанайым чөгүп турат”,- деди “Азаттыкка” Акжол Махмудов.
Акжол Махмудов 2-августта финалдык таймашка чыкканга чейин төрт беттешти ийгиликтүү өткөрдү. Алгач тунистик Ламьед Маафини 11:0 эсеби менен уткан. Чейрек финалда азербайжандык Рафиг Хусейновду 9:1 эсеби менен жеңди.
Кыз-келиндер күрөшүнөн 22 жаштагы Мээрим Жуманазарова коло медал алды. Бул эгемен Кыргызстандын Олимпиада тарыхында кыз-келиндер арасындагы алгачкы медал.
Мээрим Жуманазарова кыз-келиндер күрөшүнөн 68 килограмм салмакта үчүнчү орун үчүн беттеште монголиялык Соронзонболдын Батцэцэгди 10:1 эсебинде далысын жерге тийгизип таза утту.
Мээрим Жуманазарова жеңиштен кийин.
Мээримдин байгеси эгемен Кыргызстандын Олимпиада тарыхында кыз-келиндер арасындагы алгачкы медал.
Айсулуу Тыныбекова 3-августта кыз-келиндер күрөшүнөн 62 килограмм салмакта финалга чыкты.
Айсулуу жарым финалда украиналык спортчу Ирина Коляденкону 10:0 эсебинде утуп алды.
Айсулуу Тыныбекова биринчи айлампада төрт упай алып алдыга чыккан. 2-айлампада дагы алты упай алып, мөөнөтүнөн мурда 10:0 эсебинде жеңишти камсыздады.
Айсулуу Кыргызстандын спорт тарыхында күрөш боюнча дүйнө чемпиондугун жеңген биринчи балбан.
Жапониялык Юкако Каваи - Айсулуунун финалдагы атаандашы.
Үзүр Жусупбеков грек-рим күрөшүнөн 97 килограмм салмакта жооткотуучу мелдеште финляндиялык Арви Мартин Совалайненге жеңилди.
Атабек Азизбеков коло байге үчүн жооткотуучу беттеште күчүн сынайт.
Бишкектеги борбордук аянтта, бир катар шаарларда чоң экрандар орнотулуп, күйөрмандар кыргызстандык балбандарды сүрөөнгө алып турду.