Токиодогу Жайкы Олимпиадада күмүш медаль уткан балбан Айсулуу Тыныбекова "Фейсбук" аркылуу кыргызстандыктарга кайрылды:
"Ушул күнгө чейин мени колдоп, демиме дем кошкон ар бириңиздердин каалоо-тилектериңиздерге ийилип таазим кылам! Азыр ичимде эмоциялар кайнап, чынын айтсам ыйлагым келип турат... Спорт мени мындай учурларда күчтүү болууга үйрөттү. Такшалдык! Айта турчу сөз көп. Дагы кенен пикир алмашабыз", - деген Тыныбекова алдыдагы күндөрү беттешке чыкчу спортчуларга ийгилик каалады.
Айсулуу Тыныбекова 4-августта кыз-келиндер күрөшүнүн финалында жапониялык Юкако Каваи менен күрөшүп, 4:3 эсебинде утулуп, күмүш медаль тагынды. Ал "Азаттыкка" курган маегинде мелдешке алтын алуу максатында келгенин айтты.
23-июлда расмий башталган Токио-2020 оюндарына Кыргызстандан 16 спортчу аттанган. Алардын ону байге ала албады. Балбандар Айсулуу Тыныбекова менен Акжол Махмудов күмүш, Мээрим Жуманазарова коло медал утту.
