Ирактын аскерий кол башчылары Мосул үчүн азыркы уруштарды "айыгышкан" деп мүнөздөшүүдө.
Аскерлердин жолун бомбасы бар унаа айдаган жанкечтилер тороодо, “Ислам мамлекети” радикал тобунун согушкерлери үйдөн-үйгө көчүп, снайперлерин да жайгаштырып жатат:
- “Ислам мамлекети” террордук тобу аскерлерибиздин чабуулун жолдорго бомба, үйлөрдө мина капкандарды коюп, гранатомёттордон, миномёттордон аткылоо аркылуу токтотууга аракеттенүүдө. Бирок биз алга жылууну улантуудабыз, - деди Ирактын контртеррористтик аскерий бөлүгүндөгү кол башчылардын бири Хазим Карим 5-мартта кабарчыларга.
Өлкөнүн экинчи ири шаары Мосулдун батыш ыптасын бошотууну максат кылган чабуул ушул жекшембиден тарта кайра жанданды.
Анын алдында аба ырайынын начардыгынан улам абадан байкоо жүргүзүү мүмкүн болбогондуктан операция 48 саатка токтотулган, бул өз кезегинде согушкерлердин контрчабуулдарын да шарттады.
АКШ баштаган коалиция абадан колдоо көргөзгөн ирак күчтөрү “Ислам мамлекети” террордук тобунан шаардын батыш бөлүгүн бошотуу операциясына 19-февралда киришкен.
Мындан бир ай алдыда, былтыр 17-октябрдан берки аскерий аракеттердин натыйжасында ИМ тобунун согушкерлери Мосулдун чыгышынан сүрүлгөн. Чыгыш аянты жагынан батыш бөлүккө караганда чоң болгону менен батыш аймакта калк жыш жайгашкан.
Өкмөттүк күчтөр Мосулдун түштүк-батыш ыптасында айрым ийгиликтерге жетишкени менен шаардын батышынын басымдуу бөлүгү али “Ислам мамлекети” экстремисттик тобунун көзөмөлүндө кала берүүдө.
Мосул менен катар Сириянын Ирак менен чек арага жакын Тал Афар жана Ракка шаарлары да ушул тапта жихадчылардын колунда.
Ирак армиясы Мосулду курчап, ал жердеги согушкерлердин Тал Афар шаарындагы өнөктөштөрү менен байланышын үзүү аракетин да көрүп жатат.
“Ислам мамлекети” террордук тобу бир миллиондон ашуун калкы бар Мосулду толугу менен 2014-жылдын жайында басып алган эле.
Жихадчылардын жолбашчысы Абу Бакр ал-Багдади “халифат” түзгөндүгүн дал ушул Мосулдун чоң мечитинен туруп жарыялаган болчу.
Шаардын батыш бөлүгүн бошотуу операциясы учурундагы уруштар Эл аралык миграция уюмунун эсебинде, кеминде 45 миң адамды үй-жайынан безүүгө мажбурлады.
Соңку күндөрү аймактан тартылган видеотасмалар да жамгырда баткак кечип, уруш аймактарынан жөө-жалаңдап качып чыгууга аргасыз болгондорду, анын ичинде аялдар менен балдарды көргөзүп жатты:
- Биз ачкадан өлүп калабызбы дейм, бизде эч нерсе, атүгүл күрүч дагы жок. Ачарчылык жана бомбалоолор бизди үй-жайыбызды таштоого аргасыз кылды. Биз алсырап, чарчап бүттүк. Балдарыбыздын да жей турган эч нерсеси жок, - дейт Мосулдун Ибрагим деген качкын тургуну.
Ирак өкмөтү Мосулдун айланасында эл аралык уюмдардын жардамы менен миңдеген качкындар үчүн утурумдук чатыр лагерлерди уюштурган.
