АКШнын жаңы президенти Дональд Трамп Вашингтондо ант берип, расмий түрдө кызматка киришти. 70 жаштагы Трамп АКШнын 45-президенти.
Биринчи болуп вице-президент Майк Пенс ант берди. Вице-президенттер АКШ президенттери менен чогуу ант берүүгө 1937-жылдан тарта катыша башташкан. Ага чейин өзүнчө, Сенаттын жыйындар залында ант беришчү. Конституция боюнча АКШнын вице-президенти номиналдуу түрдө Сенаттын башчысы болуп да эсептелет жана эгерде кайсы бир маселе боюнча сенаторлордун добушу тең болуп калса, анын добушу чечүүчү болот.
Дональд Трамптын ант берүү аземи расмий башталды. Анын ачылышында сөз сүйлөгөн Конгресстеги инаугурация комитетинин төрагасы Рей Блант бүгүнкү күндү “жеңиштин эмес, демократиянын майрамы” деп мүнөздөдү.