Дональд Трамп жубайы Мелания менен Ак үйгө келатышат. Бул жерде аларды Барак Обама жубайы Мишель менен күтүшүүдө. Кызматынан кетип жаткан Обама Твиттерге буларды жазды:
"Мен дагы эле силерден ишенүүгө чакырам – өзгөрүүлөрдү алып келүүгө менин мүмкүнчүлүгүм жок, бирок силерде мындай мүмкүнчүлүк бар. Мен өзгөрүүлөргө ишенем. Себеби мен силерге ишенем”.
Трамптын инаугурациясына 50 конгрессмен катышуудан баш тартты.
Жекшемби күнү 60-жылдары жарандык укук үчүн кыймылдын лидерлеринин бири, конгрессмен Жон Льюис NBC News каналынын “Пресса менен жолугушуу” аттуу ток-шоусунда Дональд Трампты легитимдүү президент деп эсептебей турганын, андыктан ант берүү аземине катышпарын айткан.
Жаңы шайланган президент Трамп Твиттерде: “Конгрессмен Жон Льюис шайлоонун жыйынтыктары тууралуу ыйламсырагандын ордуна өз шайлоо округу менен көбүрөөк алектениши керек, ал өтө начар абалда турат. Аракетсиз жана майнапсыз куру сөздөр. Өкүнүчтүү!” деп жазган.
Ошондон кийин Трампка туш тараптан нааразы билдирүүлөр айтылып, ондогон конгрессмендер инаугурацияга катышуудан баш тартышты.
АКШнын 45-президенти Дональд Трамп үчүн инаугурация күнү Ыйык Иоанн чиркөөсүндө кеңири коомчулук жана журналисттер үчүн жабык болгон иш-чара менен башталды. Чиркөөгө жаңы шайланган президент жубайы Мелания менен келди.
Дональд Трамп жана вице-президент Майк Пенс Ыйык Иоанндын чиркөөсүнө келишти. Бул жердеги иш-чара бир саатка жакын созулат. Андан кийин шайланган президент Ак үйдө президент Барак Обама менен чай ичет.
