Украинага куралдуу кол салуу башталгандан бери Орусиядан бери дегенде 150 журналист чыгып кетти. Бул тууралуу “Агентство” басылмасы билдирди. Маалыматка караганда, алар негизинен өлкөдө иш жүзүндө аскердик цензура киргизилгенине байланыштуу кетип жатышат.
4-мартта президент Владимир Путин кол койгон мыйзамга ылайык, "куралдуу күчтөрдү колдонуу тууралуу жалган маалымат таратуу" үчүн кылмыш жоопкерчилиги каралат. Бул Украинага басып кирүүнүн "атайын операция" деген расмий формулировкасынан күмөн санаган, аны "согуш" деп атаган журналист 15 жылга чейин абакка кесилиши мүмкүн дегенди билдирет.
Өтүп бараткан жумада Роскомнадзор “Эркин Европа/Азаттык” радиосунун орус тилиндеги 9 сайтын блоктогон. Ушундай эле чара "Медуза", “Медиазона”, Би-би-си, " Америка добушу", Deutsche Welle сайттарына, Facebook жана Twitter социалдык тармактарына каршы көрүлгөн. “Эхо Москвы” жоюлду, ал эми “Дождь” өз ишин токтотту.
Армияны дискредитациялоо беренеси менен административдик иштер ачылып жатканы маалымдалууда. Мисалы, согушка каршы акцияларга чыгуу чакырыгы да мыйзам бузуу болуп каралат.
Киев Москваны "реалдуу гуманитардык коридор" түзүүгө чакырды
Украина Москваны эл аралык коомчулуктун пикирин бурмалоого аракеттенүүдө деп айыптады. 7-мартта Орусиянын Коргоо министрлиги ок атышууну убактылуу токтотуп, Киев, Мариуполь, Харьков жана Сумы шаарларындагы элдин чыгып кетүүсү үчүн гуманитардык коридор ачарын билдирген. Билдирүүдө эл кайсы маршрут менен чыга алары айтылат. Ага ылайык, Киевден орус аскерлери басып алган аймактар аркылуу Беларуска көздөй гана чыкса болот. Украин вице-премьер-министри Ирина Верещук орус тараптан сунуш түшкөнүн тастыктап, Киев маршруттарга макул эместигин айтты.
Президент Владимир Зеленскийдин басма сөз катчысы Орусиянын вариантын “адеп-ахлакка сыйбаган сунуш” деп, украин жарандарына өз өлкөсүнүн аймагы аркылуу чыгууга шарт түзүлүүгө тийиш деп билдирди. Анын айтымында, Орусия жайкын тургундарга жардам берүүдөбүз деген пикирди түзүүнү гана көздөйт. Киев Москваны “реалдуу коридорлорду” ачууга чакырды.
Орус армиясы кошуна өлкөгө басып киргенден бери Украинанын бир катар ири шаарлары аткыланып, кээ бирлери курчоодо калды. Ишемби жана жекшемби күндөрү ок атышууну токтотуу макулдашуусу бузулуп, Мариуполдун тургундарын эвакуациялоо иши үзгүлтүккө учураган. Тараптар бул үчүн бири-бирин айыпташууда.
Согуштун 12-күнүндө Украинанын бир нече жеринде салгылашуулар, аткылоолор уланды.
Соңку эки күндө (5-6-мартта) Кыргызстандын Украинадагы элчилигинин жардамы менен бул өлкөдөн дагы 80 кыргыз жараны эвакуацияланды. Бул тууралуу 7-мартта Кыргызстандын Тышкы иштер министрлиги билдирди. Мекеменин маалыматына караганда, 5-мартта Львов шаарынан Польшанын аймагына автобус менен 35 кыргызстандык чыгарылды. 6-мартта 45 кыргыз жараны Молдова-Румыния-Болгария маршруту аркылуу Түркиянын чек арасынан өттү.
Бүгүн 7-мартта Түркияга Молдова аркылуу 25 кыргызстандык жөнөтүлгөнү жатат.
4-мартта Украинанын Кыргызстандагы элчиси Идирис Кадыркулов Украинадагы окуялар башталгандан бери элчиликтин жардамы менен 255 кыргызстандык Венгрия, Польша, Молдова жана Румыния өлкөлөрүнө чыгарылганын билдирген. Ошону менен катар ал өз алдынча чыгып кетип жаткандар да көп экенин кошумчалаган.
Орусия Украинада согуш баштаган 24-февралдан бери бул өлкөдөн чыгып кетүүгө мажбур болгондор 1,5 миллиондон ашты. Кыргызстандын Украинадагы элчилиги бул күндөрү күчөтүлгөн тартипте иштеп жатат. Элчилик ошол жактагы кыргыз жарандары менен байланыш түзүп, эвакуация иштерин жүргүзүүдө.
Орус аскерлери Киевдин түндүк-батышындагы Гостомел шаарчасынын мэрин атып өлтүрүштү. Жергиликтүү бийлик өкүлдөрүнүн маалыматына ылайык, маркум ошол маалда курчоодо калган элге нан таратып жүргөн.
Шаардык кеңеш "Фейсбуктагы" баракчасына Юрий Прилипко менен кошо эки кызматкер Иван Зоря менен Руслан Карпенко окко учканын жазды. Аэродромдун жанында жайгашкан Гостомел орус армиясы басып кирген 24-февралдан бери туруштук берип жатат. 16 миңдей калкы бар шаардын басымдуу жашоочулары качып чыкты.
Ушул эле күнү Украинанын түштүгүндөгү Новая Каховка шаарында 6-мартта орус аскерлери Орусияга каршы демонстрациясынын катышуучуларына ок атканын аймактык прокуратура билдирди. Маалыматка караганда, бир киши каза болду, жетөө жараланды.