Орусия менен Украина делегацияларынын сүйлөшүүсү аяктады
Беларус-украин чек ара аймагында өткөн Украина менен Орусиянын делегацияларынын 28-февралдагы сүйлөшүүсү жыйынтыкталды.
Орусиялык делегацияны жетектеп келген президент Владимир Путиндин жардамчысы Владимир Мединский беш сааттын ичинде алар бардык маселелерди сүйлөшкөнүн, айрым маселелерде тил табышууга жакындашканын айтты. Ал тараптар эми сүйлөшүүнүн экинчи айлампасында кездешерин, аны беларус-поляк чек арасында өткөрүү тууралуу макулдашканын кошумчалады.
Украин президентинин кеңешчиси Михаил Подоляк Украинанын аймагында ок атууну токтотуу үчүн тараптар айрым чечимдерди такташканын, калганын өз жетекчилери менен такташуу үчүн артка кайтып жатышканын билдирди.
Орусиянын президенти Владимир Путиндин "Донбасстагы калкты коргоо" тууралуу билдирүүсүнөн кийин орус аскерлери 24-февралда Украинага басып кирди. Беш күндөн бери Украинанын бардык аймактарында аткылоо жана бомбалоо уланууда. Эң катуу чабуулдар Киевге жасалды.
Украиналык маалымат каражаттары Орусиянын аскердик кол салуусунан 352 украиналык жайкын тургун каза болгонун, алардын үчөө жаш балдар экенин жазды. Окуянын алгачкы күнү Киев 137 аскери курман болгонун маалымдаган, андан кийинки жагдай азырынча белгисиз.
Мунун алдында Украинанын Коргоо министрлиги Орусиянын армиясынын жоготуулары 5300 жоокерди түзөрүн маалымдаган. Бул категориянын ичинде өлгөндөр, колго түшкөндөр, жарадарлар кошо санала турганын ырастаган.
Орусия өлгөн же жараат алган аскерлери бар экенин моюнуна алганы менен алардын санын айта элек. Орусиянын Коргоо министрлиги Украинанын 1000ге жакын аскердик объектисин талкалаганын гана маалымдады.
Президент Владимир Зеленский Украинанын Европа Биримдигинин мүчөлүгүнө кирүү тууралуу арызына кол койду. Бул тууралуу президент өзү «Телеграм-каналында» кабарлап, кол коюу жараянынын жана документтин сүрөтүн жарыялады.
Арыз Еврокомиссиянын президенти Урсула фон дер Ляйенге жазылды. Ал качан каралары жана өлкө уюмга качан кирери белгисиз. Мурдараак өлкөнүн премьер-министри Денис Шмыгал Украина уюмга атайын тартип менен кирерин билдирген.
Мунун алдында Зеленский видео кайрылуу менен чыгып, Европа Биримдигин “кечиктирилгис процедуранын негизинде” Украинаны кошуп алуусун өтүнгөн. Ал украин армиясы өз жери үчүн эле эмес, жалпы Европа үчүн согушуп жатканын белгилеп, “уюмга кошулууга татыктуу” экенин белгилеген.
Орусиянын Бириккен Улуттар Уюмундагы 12 дипломаты персона нон-грата деп жарыяланды. Бул тууралуу Орусиянын бул уюмдагы туруктуу өкүлү Василий Небензя 28-февралда билдирди.
Ал мындай чечимди АКШ кабыл алганын, Нью-Йорктогу дипломаттар 7-мартка чейин өлкөдөн чыгып кетиши керек экенин айтты.
Кошмо Штаттардын БУУдагы өкүлдөрү түшүндүргөндөй, орус дипломаттары өз милдеттерине жана жоопкерчилигине кирбеген иш-аракеттер менен алек болгону өлкөдөн чыгарылып жатат.
Дипломаттарга байланыштуу соңку чечим Батыш өлкөлөрү Орусиянын Украинага согуш ачканын айыптап, Москвага санкцияларды жарыялап жаткан маалда кабыл алынды.
Эл аралык футбол федерациясы (ФИФА) жана Европанын футбол ассоциацияларынын биримдиги (УЕФА) Орусиянын улуттук курама командаларын жана бардык клубдарын эл аралык футбол мелдештеринен убактылуу четтетти. Мындай чечим Орусиянын Украинага кол салганына жооп иретинде кабыл алынды.
Ошондой эле УЕФА демөөрчүлүккө байланыштуу Орусиянын “Газпром” компаниясы менен түзүлгөн келишимдерди да токтотту.
“Футбол биримдикте жана Украинадагы жабыркаган элге толук тилектеш”, - деп айтылат эки уюмдун биргелешкен билдирүүсүндө.
ФИФА менен УЕФАнын соңку чектөөсү канчага созулары азырынча белгисиз.
Мунун алдында Эл аралык Олимпиада комитети спорттук федерацияларды орусиялык жана беларус спортчуларына, расмий адамдарына мелдештерге катышууга уруксат бербөөгө чакырган.
Жекшембиде Дзюдо боюнча эл аралык федерация орус президенти Владимир Путинди «ардактуу төрага» деген наамынан ажыратууну чечкен.
Орусия кошуна өлкөгө кол салгандын эртеси эле «Формула-1» 25-сентябрга пландалган жарыш Сочи шаарында өткөрүлбөй турганын жарыялаган. Мунун артынан УЕФА Чемпиондор лигасынын финалын Санкт-Петербургдан Парижге которуу чечимин кабыл алган.