Украинанын Днепрорудное шаарынын башчысы Евгений Матвеев Орусияда туткунда кармалып турган маалда кыйноолордон көз жумду. Бул тууралуу Запорожье облусунун аскердик администрациясынын жетекчиси Иван Федоров билдирди. Ал 4-декабрда Телеграмга жарыялаган билдирүүсүндө Матвеевдин сөөгү жакында эле Орусия менен Украинанын ортосунда туткундарды алмашуу жараянынын алкагында кайтарылганын жазды. Орус армиясы Днепрорудное шаарын 2022-жылдын февралында Украинага бастырып киргенден көп өтпөй ээлеп алган. Матвеев туткунга ошол жылдын март айында түшкөн.
"Ал баскынчылардын туткунунда эки жыл сегиз ай отуруп, өлгүчө кыйноого алынган. Соңку айырбаштоо учурунда анын сөөгү Украинага кайтарылды", - деди Федоров.
Өткөн айда эки өлкө ортосундагы туткундарды айырбаштоо жараянынын алкагында Украина Орусиядан 502 аскердин жана карапайым тургундун сөөгүн кайтарган. Алардын 17си өлүкканалардан табылган.
Орусиянын расмий бийлигинин өкүлдөрү Матвеевдин өлүмү тууралуу билдирүүлөргө комментарий берген жок.
2023-жылдын октябрь айында Бириккен Улуттар Уюмунун Украинадагы кырдаалды иликтеген комиссиясы Орусия "согуш кылмыштарын жана адам укуктарын олуттуу бузууну улантып" жатканын аныктаган. Анын ичинде "орус бийлиги жабык жайларда кыйноолорду такай колдонуп келгени" белгиленген.
Согуш башталганы Орусия тараптан Украинанын дарегине да согуш кылмыштарына байланыштуу айыптоо айтылып келет. Бирок мындай айыптар Орусияга салыштырмалуу аз айтылат.
Орус армиясы 3-декабрга караган Тернополь шаарына “Шахед” дрондору менен сокку урду. Аппараттардын бири электр түйүнгө тийип, калаанын жарымынан көбү жарыксыз калганын жергиликтүү бийлик билдирди.
Шаар мэри Сергей Надалдын айтымында, учурда тиешелүү кызматтар жарыкты калыбына келтирүүнүн үстүндө иштеп жатышат. Ошол эле учурда ал тургундарды таза суу камдап алууга чакырды.
Орус армиясы 2-декабрга караган түнү да Тернополго сокку урган. Дрондордун бири беш кабат үйгө тийген. Бир кишинин өмүрү кыйылып, үч адам жараат алды.
Жалпысынан 3-декабрга караган түнү орус күчтөрү Украинага 28 "Шахед" жана башка дрондор менен сокку урганы маалым болду. Бул тууралуу Украин армиясынын Абадан коргонуу күчтөрү билдирди. Чернигов, Хмельницк, Житомир, Одесса, Николаевск, Днепропетровск облустарында дрондордун баары абадан атып түшүрүлдү.
Ал арада Кошмо Штаттар Украинага 725 миллион долларлык кошумча жардам бөлдү. Бул тууралуу Ак үй 2-декабрда билдирди. АКШ президенти Жо Байден Конгресс Украинага бөлгөн каражатты президенттик мөөнөтү 20-январда аяктаганча толук берүүнү убада кылган.
2-декабрда Киевге күтүүсүз барган Германиянын канцлери Олаф Шольц Украинага ушул айда эле 650 миллион евролук жаңы курал-жабдык жеткирүүгө сөз берген.
"Германия 28 миллиард евролук жардам берүү менен АКШдан кийинки эле Украинанын экинчи ири аскердик демөөрчүсү. Абадан коргонууга жардам берүү биз үчүн негизги орунда", -деди Германиянын канцлери Олаф Шольц.
Кремлдин маалымат катчысы Дмитрий Песков бул кошумча жардамдар фронттогу кырдаалды өзгөртпөстүгүн билдирди.
Түндө Орусия Украинага 110дой дрон учурду
2-декабрга караган түнү Орусия Украинага Shahed тибиндеги 110 сокку уруучу учкучсуз аппарат жана башка типтеги дрондор менен чабуул жасаганын Украинанын Куралдуу күчтөрү билдирди.
"8:30га карата Киев, Черкассы, Чернигов, Винница, Хмельницкий, Житомир, Сумы, Полтава, Харьков жана Днепропетровск облустарында душмандын 52 учкучсуз учуучу аппаратынын жок кылынганы тастыкталды. Мындан тышкары, 50 дрон радиоэлектрондук күрөш (РЭБ) каражаттарынын таасиринен улам локациядан жоголгон деп болжолдонууда. Ал эми алтоо абадан көзөмөлдөн чыккандан кийин Орусия жана Беларус багытына чыгып кеткен, дагы бирөө абада жок кылынган. Согуштук аракеттер уланууда", – деп жазылат билдирүүдө.
Аба күчтөрүнүн маалыматы боюнча, учкучсуз аппараттар Орусиянын Курск, Орел, Миллерово жана Приморско-Ахтарск багыттарынан учурулган.
Тернополь шаарында түнкү соккудан улам бир адам каза болуп, үчөө жаракат алды деп 2-декабрда Өзгөчө кырдаалдар кызматы билдирди.
Орусиялык аскерлер ар кандай курал түрлөрү – сокку уруучу дрондор, ракеталар, бомба таштоочу түзүлүштөр (КАБ), ракеталык системалар (РСЗО) аркылуу Украина аймактарына үзгүлтүксүз чабуул жасоодо.
Орусиянын жетекчилиги армиясы толук масштабдуу согушта Украина шаарлары менен айылдарынын жарандык инфраструктурасына атайын сокку уруп, жай тургундарды набыт кылып, оорукана, мектеп, бала бакча, энергетика жана суу менен камсыздоо объектилерин жок кылып жатканын четке кагып келет.
Украинанын бийлиги жана эл аралык уюмдар бул соккуларды Орусиянын согуштук кылмыштары деп баалап, алар атайын максаттуу мүнөздө жүргүзүлүп жатканын белгилеп келет.
БУУ октябрь айынын аягындагы маалыматында Орусиянын толук масштабдуу баскынчылыгы башталгандан бери Украинада 12 162 жай тургун каза болуп, 26 919 киши жаракат алганын тастыктаган. Ошол эле учурда уюмдун билдирүүсүндө, чыныгы сандар алда канча көп болушу мүмкүн экени баса белгиленген.
Германия канцлери Шольц Киевге күтүлбөгөн визит менен барды
DPA агенттиги билдиргендей, дүйшөмбү күнү Германиянын канцлери Олаф Шольц күтүлбөгөн визит менен Киевге келди.
Шольц Киевде Украина президенти Владимир Зеленский менен жолугушуп, сүйлөшүүлөрдү өткөрөт.
"Президент Зеленский менен жолугушуумда декабрда жеткирилүүчү 650 млн евролук кошумча куралдануу боюнча жарыялаймын", - деп жазды канцлер социалдык тармактагы X баракчасына.
Акыркы жолу Шольц Украинанын борбору Киевге 2022-жылдын жайында, Орусиянын толук масштабдуу баскынчылык согушу башталгандан кийинки биринчи визитинде барган.
Германия өкмөтүнүн маалыматы боюнча, Украинага аскердик жардам үчүн 2022-жылы 1,6 миллиард евро, 2023-жылы 5 миллиард евро бөлүнгөн. Мындан тышкары 2025-2028-жылдарга жардам катары дагы 2,9 миллиард евро каралган.