Украина Орусиянын чабуулдарынан дагы кеминде алты жайкын тургунунан ажыраганын 11-ноябрда билдирди. Бул жолу Николаев, Запорожье шаарларында адамдар каза болду.
Өзгөчө кырдаалдар боюнча мамлекеттик кызматтын соңку маалыматына караганда, Николаевде учкучсуз учак соккусунан кеминде беш адам каза тапты, алардын сөөгүн куткаруучулар уранды астынан алып чыгышты, бир нече үй талкаланып, өрттөндү. 22 кишиге психологиялык жардам көрсөтүлүүдө, стресс алган бир аялдын абалы оор деп бааланууда.
Запорожье аймагында дүйшөмбүгө караган түнү бир киши каза тапканы, кеминде тогуз киши жараат алганы, алардын арасында 4-15 жаштагы балдар бар экени, бир нече үй кыйраганы белгилүү болду.
Өткөн түнү Кривой Рог шаары да Орусиянын чабуулуна кабылды. Өзгөчө кырдаалдар боюнча мамлекеттик кызмат жарыялаган сүрөттөрдөн баш кабаттуу үй катуу талкаланганын көрүүгө болот. Бул жерде кеминде сегиз киши жараат алды, арасында кичине балдар бар.
Украинанын Куралдуу күчтөрүнүн маалыматына караганда, 11-ноябрга караган түнү өлкө аймагына Орусия Shahed согуштук дрондорунан 74тү учурду, аралыктан башкарылуучу Х-59/69 ракеталарынан экөөнү колдонду. Эки ракета тең жана дрондордун 39у Киев, Житомир, Полтава, Сумы, Черкасск, Запорожье, Чернигов, Днепропетров жана Николаев облустарынын аймагынан атып түшүрүлдү.
Согуш шартында бул маалыматты өз алдынча тактоо мүмкүн эмес.
Украин президенти Владимир Зеленский Орусия аёосуз чабуулдарын улантып жатканын, өлкөсү Батыштагы өнөктөштөрүнүн жардамына муктаж экенин 9-ноябрда кезектеги кечки кайрылуусунда айтып, бул күнү Орусия согуш башталгандан бери эң көп сандагы дрону менен бутага алганын билдирген.
Москва АКШнын жаңы шайланган президенти Дональд Трамп менен Орусия президенти Владимир Путин телефондон сүйлөшкөнү тууралуу маалыматты жокко чыгарууда. Кремлдин басма сөз катчысы Дмитрий Песков 11-ноябрда журналисттердин суроолоруна жооп берип жатып:
"Сүйлөшүү болгон эмес. Бул чындыкка таптакыр дал келбеген, ойдон чыгарылган, жөн гана жалган маалымат", - деди.
Орус президенти менен америкалык жаңы лидер ортосунда кандайдыр бир байланыш пландалып жатабы же жокпу деген суроого Песков "азырынча конкреттүү план жок" деп билдирди.
Washington Post басылмасы 10-ноябрда жеке булактарына таянып, Трамп 7-ноябрда Путин менен телефондон сүйлөшүп, Украина маселесин такуулаганын, Киев бул сүйлөшүү тууралуу кабардар болгонун, каршылыгын билдирбегенин жазган.
Трамп шайлоодогу жеңишинен кийин Путин менен телефондон сүйлөшкөнүн Reuters да кабарлаган.
Путин Трамптын шайлоодогу жеңиши менен бир күндөн кийин бейрасмий куттуктап, аны менен сүйлөшүүгө даярдыгын билдирген.
Орусия Курск облусундагы Украина ээлеп алган аймактарын кайтарып алуу максатында чабуул жасоо үчүн түндүк кореялык жоокерлер менен кошо 50 миңдей аскер чогултту. Бул тууралуу The New York Times гезити жекшембиде АКШ жана Украинадагы булактарына таянып билдирди.
Америкалык аткаминерлердин жаңы маалыматтарына караганда, Орусия бул кадамы менен Украинанын чыгышынан аскерлерин алып кетпөө аракетин көрүүдө. Ошол эле учурда Москва Украинага бир учурда бир нече багыттан басым жасоону көздөөдө деп жазылган макалада.
Украин бийликтери болсо Курск аймагында Түндүк Корея күчтөрүнүн катышуусунда Орусиянын ири чабуулун күтүп жатышканын билдирген.
Макаладагы маалыматтарга ылайык, ушул тапта түндүк кореялык аскерлер орус армиясы менен чогуу Курскинин батыш тарабында машыгууда. АКШ Коргоо министрлигинин өкүлдөрү түндүк кореялык жоокерлер орус аскерлеринин формасын кийип, Москвадан жиберилгени менен өздөрүнүн бөлүктөрүндө согушарын билдиришүүдө.
Пентагондун өкүлдөрү Орусия түндүк кореялык жоокерлерди артиллерияны, жөө аскерлердин согуштук тактикаларын, траншея тазалоого үйрөтүп жатканын белгилешип, бул даярдыктан улам алар Украинанын бекемделген коргонуучу позицияларына чабуул коюусу ыктымалдыгын түкшүмөлдөшкөн.
Вашингтон Пхеньян Орусиянын армиясын колдоо үчүн 10 миң аскерин жибергенин маалымдаган. Украина, Батыш өлкөлөрү жана НАТО Орусия Түндүк Кореядан он миңдеген аскер алдырганын, аларды Украинага каршы согушка салганы жатканын айтып жатышат.
Украина орус бийлиги чек арадагы Курск облусуна кеминде 10 миңдей түндүк кореялык аскерди алып барганын, ноябрь айынын алгачкы күндөрүндө алар менен биринчи кагылышуу болгонун 6-ноябрда билдирген. Согуш шартында бул маалыматты өз алдынча тактоо мүмкүн эмес болууда.
Орус президенти Владимир Путин 9-ноябрда Орусия менен Түндүк Кореянын ортосундагы ар тараптуу стратегиялык өнөктөштүк тууралуу келишимди ратификациялоо жөнүндөгү мыйзамга кол койду. "Свобода" радиосу жазгандай, келишимге ылайык, эгер бири куралдуу кол салууга кабылса, экинчиси тез арада аскердик же башка жардамын берүүгө милдеттүү болот, үчүнчү өлкөлөр менен экөөнүн бирине залака тийгизиши ыктымал келишимдерге кол койбойт.
Орусиянын Запорожьеге жасаган соккусунан бир адам каза болуп, жабыркагандар 21ге жетти
Облустук аскердик администрациянын башчысы Иван Федоров 11-ноябрь күнү эртең менен билдиргендей, Запорожьеге жасалган орусиялык аскерлердин соккусунан 21 адам жабыркаган.
Мындан тышкары, ал акыркы сутка ичинде орус аскерлери облустун 10 калктуу конушуна 356 жолу сокку урганын билдирди. Облустук бийликке турак жайлардын жана инфраструктура объектилеринин кыйрашы тууралуу 44 билдирүү келип түшкөн.
Ички иштер министрлиги да жабыркагандардын санынын өскөнүн билдирди:
"Шаарга жасалган орус авиасоккуларынан жабыркагандардын саны 21 адамга жетти. Бир адам каза болду. Орусия Федерациясынын аскерлери УМПКдан ФАБ-500 менен үч жолу авиасоккусун жасады".
Орус аскерлери соккучу учкучсуз учуучу аппараттар, ракеталар, КАБдар, РСЗОлор сыяктуу ар кандай куралдар менен украин аймактарына үзгүлтүксүз чабуул жасап келе жатат.
Орусиянын жетекчилиги толук масштабдуу согуш учурунда орус армиясы Украинанын шаарлары менен айылдарынын жарандык инфраструктурасына атайын сокку уруп, жарандык калкты өлтүрүп, ооруканаларды, мектептерди, бала бакчаларды, энергетика жана суу менен камсыздоо объектилерин кыйратып жатканын танып келет.
Украина бийлиги жана эл аралык уюмдар бул соккуларды Орусиянын аскердик кылмыштары катары квалификациялап, алардын максаттуу мүнөзгө ээ экенин баса белгилешүүдө.