Орусиянын Коргоо министрлиги 1-ноябрда эртең менен абадан коргонуу системалары өлкөнүн алты аймагында Украина учурган жалпысынан 83 согуштук дронду жок кылганын билдирди.
Мекеменин Telegram каналындагы маалыматында айтылгандай, учкучсуз учактардын 36сы Курск облусунда, 20сы Брянск облусунда, 12си Крымда, сегизи Воронеж, төртөө Орлов жана үчөө Белгород облустарында жок кылынды.
Брянск облусунун губернатору Александр Богомаз дрондордун бири Брянск шаарында турак үйгө тийгенин, бир киши жараат алганын кабарлады.
Ставрополь крайында учкучсуз учак Светлоград шаарындагы мунай базасына барып тийгенин аймактын губернатору Владимир Владимиров Telegram каналына жазды.
Ал эми Украина Орусия учурган 31 согуштук дронду атып түшүргөнүн кабарлады. Мындан тышкары, өлкөнүн Куралдуу күчтөрүнүн басма сөз кызматы маалымдагандай, орус аскерлери ракета менен да атышты.
Кара деңиздеги Одесса портунда ракетанын соккусунан өрт өчүрүүчү бөлүктөрдүн бири талкаланганын, натыйжада эки өрт өчүрүүчү кызматкер жараат алганын аймактын башчысы Олег Кипер маалымдады.
Украинанын Орусиянын толук масштабдуу агрессиясына каршы күрөшү 2022-жылдын февраль айынан бери уланууда.
Харьковго авиасокку урулду, бир адам каза таап, 30 адам жарадар
Орусиялык аскерлер 30-октябрдын кечинде Харьковго авиасокку урду. Эки адам каза тапты, отуздайы жабыркады. Бул тууралуу облустук аскердик администрациянын башчысы Олег Синегубов билдирди. Анын айтымында, 12 жаштагы бала чарчап калды. Аны уранды астынан башы жарылып, сөөк-саагы сынган абалда таап чыгышты. Уранды астында дагы 15 жаштагы эркек бала бар.
АКШнын Коргоо министри Ллойд Остин Орусиянын Украинага каршы согушуна түндүк кореялык аскерлердин тартып жатышын "кооптуу жана дестабилдештирүүчү эскалация" деп атап, бул кадам жаңжалды дагы узартып жибериши мүмкүн деген пикирин бөлүштү.
Пентагондо 30-октябрда өткөрүлгөн маалымат жыйында Остин Орусиянын чыгышында 10 миңдей түндүк кореялык аскер жайгаштырылганын кошумчалады.
Маалыматка караганда, орус армиясынын формасын кийип, курал-жарагы менен жабдылган аскерлердин бир бөлүгү Курск облусуна багыт алды. Дагы бир бөлүгү Курск облусуна жайгаштырылды.
Украинанын армиясы 6-августта Орусиянын Курск облусуна кирип барып, ал жакта жүздөгөн чарчы чакырым аймакты ушул күнгө чейин өз карамагында кармап турат.
Кошмо Штаттар түндүк кореялык аскерлердин жаңжалга тартылышына олуттуу карап, Кремлди бул кадамдан баш тартууга чакырып жатат.
Москванын Бириккен Улуттар Уюмундагы (БУУ) туруктуу элчиси Нью-Йоркто 30-октябрда өткөн Коопсуздук кеңешинин жыйынында Орусия менен Түндүк Кореянын алакасы эл аралык укукка каршы келбестигин жана "үчүнчү өлкөгө каршы багытталбаганын" айтты.
Василия Небензя ошондой эле түндүк кореялык аскерлердин фронтко салынганы тууралуу кабарларды четке какты.
Түндүк кореялык аскерлер Орусияга жайгаштырылганы тууралуу маалыматты алгач расмий Сеул бир нече жума мурда билдирген. Кийин бул кабарларды украин бийлиги, андан соң НАТО ырастады.
Украинанын борбор калаасы Киевде 30-октябрда Орусиянын учкучсуз учактарынын чабуулунан кеминде тогуз киши жараат алды. Бул тууралуу Telegram каналы аркылуу шаардын аскердик администрациясы кабарлады.
Бутага Соломенский району алынганы, көп кабат үйлөрдүн бириндеги бир нече батирде өрт чыкканы, 18 киши эвакуация болгону, жараат алган тогуз кишинин бири бала экени маалымдалды.
Жалпысынан өткөн түнү Украинанын Куралдуу күчтөрүнүн абадан коргонуу системалары он облустун (Киев, Черкасск, Хмельницкий, Харьков, Запорожье, Донецк, Днепропетров, Сумы, Чернигов жана Полтава) аймагына учурулган 62 согуштук дрондун 33үн атып түшүрүүгө үлгүргөнү маалым болду.
Ал тапта АКШнын Коргоо министрлиги Орусия Түндүк Кореядан барган аскерлердин айрымдарын Украина менен чектешкен Курск облусуна жеткиргенин 29-октябрда ырастап, алар украин аскерлерине каршы согушка салынышы ыктымал экенин эскертти.
Кошмо Штаттардын президенти Жо Байден түндүк кореялык аскерлер Курскиде экендигине тынчсыздануусун билдирип, эгер Украинанын аймагына кире турган болсо жооп катары аларга каршы ок ачса болорун айткан.