Бириккен Улуттар Уюмунун (БУУ) башкы катчысы Антониу Гутерриш Орусиянын президенти Владимир Путин менен Казан шаарында БРИКС саммити учурунда жолугушканда Орусиянын Украинага басып кириши БУУ Уставын жана эл аралык мыйзамдарды бузгандык болуп эсептелерин айтты. Бул тууралуу маалымат БУУнун сайтына 24-октябрда жарыяланды.
Анда “Башкы катчы Орусиянын Украинага басып кириши БУУ Уставына жана эл аралык мыйзамдарга каршы келет деген позициясын кайталады. Ал БРИКС саммитинде сүйлөгөн сөзүндө БУУ тынчтыкты колдой турганын баса белгиледи. Башкы катчы Кара деңизде кемелердин жүрүү эркиндигин орнотуу Украина, Орусия үчүн жана дүйнөнүн азык-түлүк жана энергетикалык коопсуздугу үчүн эң маанилүү экенине ишенерин билдирди”, - деп айтылды.
Гутерриш Путин менен акыркы жолу согуш башталган алгачкы мезгилде, 2022-жылдын апрелинде жолуккан.
Айрым талдоочулар Гутерриш ошондон бери Украинанын шаар-кыштактарын, инфраструктурасын талкалап жаткан орус президенти Путин менен кол алышканын сындап жатышат.
Орусиялык аскерлер Селидового чабуул коюуда
Орусиялык аскерлер Донецк облусунун чыгышындагы украин аскерлеринин логистикалык борбору Покровскинин түштүк тарабындагы Селидово шаарында алга жылууда. Бул орусиялык чабуулдун быйылкы эң маанилүү багыты. Украиналык күчтөрдүн башкы штабы күн сайын бул багыттагы орусиялык чабуул тууралуу маалымат берүүдө.
Селидовону орусиялык күчтөр үч тарабынан курчап турат. Фронттогу кырдаалга көз салган украиналык DeepState долбоору "активдүү курчоо" жүрүп жатканын, Орусия бул шаарга болгон күчүн таштаганын билдирди.
Америкалык согушту изилдөө институту орусиялык күчтөрдүн "маанилүү тактикалык алга жылууларын" белгилеп, бирок Селидового басым кылуу анын Покровскиге чабуулун чектей турганын билдирди.
Аналитиктер буга чейин Орусия Селидовону Покровскиге чабуулга чейин басып алып, флангдарын сактоону көздөп жатканын айтышкан.
Орусиянын армиясы Херсондун борборундагы көп кабаттуу үйгө сокку урду, эки киши жабыркады.
Бул тууралуу облустук аскердик администрация кабарлады. Бийликтин маалыматында, 64 жаштагы аял бутунан жараат алса, 72 жаштагы киши контузия алган деген диагноз коюлган.
Аларга жеринде медициналык жардам көрсөтүлдү. 24-октябрда кечинде орус армиясы Донецк облусундагы "Жаңы почта" бөлүмүнө сокку урган. Эки киши каза болуп, бирөө жараат алды.
"Орусия кайрадан жарандык объектилерге сокку урду, андан сырткары администрациялык имарат дагы зыян тартты", - деди Донецк облусунун аскердик администрациясынын башчысы Вадим Филашкин.
Украинанын абадан коргонуу системалары бейшембиге караган түнү жана эртең менен өлкөнүн 11 аймагында Орусия учурган согуштук 50 дрондун 40ын атып түшүрүүгө үлгүргөнүн, жетөө электрондук жана навигациялык тоскоолдуктан улам адаштырылганын Куралдуу күчтөрдүн басма сөз кызматы билдирген.
Учкучсуз учактар Одесса, Николаев, Днепропетровск, Винница, Житомир, Хмельницкий, Черкасск, Кировоград, Киев, Полтава жана Чернигов облустарынын аймагына учурулганы маалымдалды. Дрондордун экөө Орусияга жана Беларуска кайткан.
Украинанын абадан коргонуу системалары бейшембиге караган түнү жана эртең менен өлкөнүн 11 аймагында Орусия учурган согуштук 50 дрондун 40ын атып түшүрүүгө үлгүргөнүн, жетөө электрондук жана навигациялык тоскоолдуктан улам адаштырылганын Куралдуу күчтөрдүн басма сөз кызматы билдирди.
Учкучсуз учактар Одесса, Николаев, Днепропетров, Винница, Житомир, Хмельницкий, Черкасск, Кировоград, Киев, Полтава жана Чернигов облустарынын аймагына учурулганы маалымдалды. Дрондордун экөө Орусиянын жана Беларустун аймагына кайткан.
Ал эми Харьков облусунда Купянск шаарында орус аскерлеринин соккусунан адамдар жабыркаганын, арасында каза болгондор бар экенин, баштапкы маалымат боюнча өлгөндөр экөө деп эсептелип жатканын облустук аскердик администрация башчысы Олег Синегубов билдирди.
Хмельницкийде дрондун сыныктары түшкөн жерде өрт чыгып, турак үйдүн жана мейманкананын 40ка жакын тургуну эвакуация болду.
Дрондон тышкары Орусия бул жолу Украинаны башкарылуучу эки жана дагы канаттуу эки ракета менен атты. Алардын бири да максатына жетпегени белгиленди.
Украин президенти Владимир Зеленский өлкөнүн «жеңиш планы» толук ишке ашканда украин тарап демилгелеген Тынчтык саммитине Орусия да катышарын бүгүн 24-октябрда «Крым платформасы» саммитинин катышуучуларына кайрылуусунда айтты. Планда Орусияны согушун токтотууга аргасыз кыла турган бардык кадамдар жазылганын белгиледи.
Зеленский беш пункттан турган «жеңиш планын» өлкө парламенти Жогорку Радага 16-октябрда айтып берген. Ал өнөктөштөрдү “алыска атуучу куралды Украинанын Орусия басып алган бардык аймактарында жана Орусиянын өзүндө, анын аскердик инфраструктурасында колдонууга каршы чектөөнү алып салууга” жана “запастагы бригадаларды жабдууга жардам берүүгө” чакырган.
Орусия Украинага кол салбаганын, атайын аскердик операция гана жүргүзүп жатканын айтууда.