Украинанын президенти Владимир Зеленский Нью-Йорк шаарына барды
Украинанын президенти Владимир Зеленский 22-сентябрда Нью-Йорк шаарына (АКШ) барды. Бул тууралуу ал жекшемби күнү кечинде Х (мурдагы Твиттер) социалдык түйүнүндөгү баракчасына жазды. Украин президенти ушул аптада Бириккен Улуттар Уюмунун (БУУ) Башкы ассамблеясынын жыйынында сөз сүйлөйт деп күтүлүүдө.
Андан тышкары 26-сентябрда Вашингтондо АКШнын президенти Жо Байден менен жолугуша турганы кабарланган. Ошондой эле АКШнын вице-президенти жана демократтардан президенттикке талапкер Камала Харрис да Зеленский менен өзүнчө жолугушуу өткөрөт. Лидерлер Орусия менен Украинанын ортосундагы согуштун абалын, анын ичинде Украинанын стратегиялык пландарын жана АКШнын Украинаны коргоодогу колдоосун талкуулашат.
Владимир Зеленский АКШга сапар учурунда президенттикке республикачылардан талапкер Дональд Трамп менен да жолугушууну пландап жатканы айтылган.
Украинанын президенти АКШга баратканда жазган видеокайрылуусунда “бул согушта мындан ары эмне болору ушул күздө чечилет” деп билдирди.
Запорожьеде 13 адам жаракат алды
Украинанын Запорожье аймагына жасалган орустардын кечки чабуулунан, акыркы маалыматтар боюнча, 13 адам жабыр тартты. Бул тууралуу Запорожье облустук аскердик администрациясынын башчысы Иван Федоров билдирди.
"Орустардын Запорожьеге жасаган чабуулунун натыйжасында 13 адам жаракат алды: жети аял, беш эркек жана 15 жаштагы бала", - деп жазды Федоров телеграмда.
Орус аскерлери 22-сентябрда саат 23:00 чамасында Запорожьеге сокку урган. Федоров чабуулдун кесепетинен имараттар жарым-жартылай бузулганын билдирди.
Орус күчтөрү ар кандай куралдарды - согуштук учкучсуз учуучу аппараттарды, ракеталарды, башкарылуучу авиабомбаларды, көп огу бар реактивдүү системаларды колдонуп, Украинанын аймактарына үзгүлтүксүз чабуул жасап жатышат.
Орусиянын жетекчилиги толук масштабдуу согуш учурунда орус армиясы Украинанын шаарлары менен айылдарынын жарандык инфраструктурасына атайын чабуул жасап, жарандык калкты өлтүрүп, ооруканаларды, мектептерди, бала бакчаларды, энергетика жана суу менен камсыздоо объектилерин талкалап жатканын танып келет.
Украина бийлиги жана эл аралык уюмдар бул чабуулдарды Орусиянын согуштук кылмыштары катары баалап, алардын максаттуу мүнөзүн баса белгилешет.
"Свобода" радиосу Казакстандын Алматы шаарындагы аба майданда орус жараны Евгений Наказненко кармалганын жазды. Ал Орусиянын Ички иштер министрлиги тарабынан издөөдө жүргөн. Кармалган жаран Орусияга өткөрүлүп бериши мүмкүн.
"Свобода" радиосунун маалыматына караганда, Евгений Наказненкого "армия тууралуу фейк маалымат таратуу жана терроризмге чакыруу" беренелери менен иш козголгон. Кылмыш иши тууралуу так маалымат белгисиз. Наказненко өзүнүн социалдык тармактагы баракчасында согушка каршы пикирин билдирип, орус бийлигинин саясатын кескин сындап келген.
Оппозициячыл журналист Евгения Балтатарова Наказненкону жоопкерчиликке тартуу тууралуу маселени орусиячыл көз караштагы казакстандык блогер Антон Бударов көтөргөнүн жазды.
Адвокат Диас Кентай улы Ахметов "Сота" басылмасына Наказненко ага карата Орусияда козголгон кылмыш иштери тууралуу кабары жоктугун жана жашырынууга аракет кылбаганын айтканын билдирген.
ОВД-Инфонун маалыматы боюнча, Наказненкону Алматы аэропортунда Түркияга бараткан жеринен кармап кетишкен. Сот аны 40 күнгө Алматыдагы убактылуу кармоочу жайда кармоо тууралуу чечим чыгарган.
Евгений Наказненко 8-августта Орусиянын “экстремисттер менен террорчулар” реестрине киргизилгени белгилүү болду.
Анын улуту украин, орус жарандыгына ээ. 2007-жылдан бери Казакстанда жашап, Oxford Team чет тилдер мектебин негиздеген.
Орусиянын тарабында Украинадагы согушка катышып, каза тапкан эки тажикстандык жарандын сөөгү мекенинен келгенин "Озоди" радиосу жазды.
36 жаштагы Садик Камбаровдун сөөгү Тоолуу-Бадахшан автоном облусунун Ишкашим районуна алып келинди. Маалыматка караганда, ал Орусиянын армиясынын катарында Украинада согушуп курман болгон. Камбаров 18-июлда каза болгон, сөөгү сентябрда жеткирилген.
Экинчи маркумдун аты-жөнү, анын кандай жагдайда каза болгонун жергиликтүү бийлик ачыктаган эмес.
Маркумдар кандай жагдайда согушка тартылганы белгисиз.
Борбор Азиянын башка өлкөлөрүндөй эле Тажикстанда да чет өлкөдөгү согуштук аракеттерге катышкан жарандар жоопко тартылат. Тажик өкмөтү бул берене боюнча кармалган же соттолгон учурларды расмий билдире элек.
Укук коргоочулар борбор азиялык мигранттардын айрымдары өз ыктыяры менен согушка барганын, айрымдары орус паспортун алгандан кийин аскерге чакырылганын, айрымдары Орусиянын абактарынан жиберилгенин билдиришет.