АКШ Украинага орус агрессиясына туруштук берүү үчүн узак аралыкка учуучу ракеталарды колдонууга киргизилген чектөөнү алууну караштырууда.
Бул тууралуу шейшембиде АКШ президенти Жо Байден билдирди. Маалыматка караганда, Ак үйдүн администрациясы “маселенин үстүнөн иштеп жатат”. Азырынча Вашингтон алыска сокку урган андай оор куралды, өзгөчө Америкада өндүрүлгөн системаларды жаңжалдын күчөшүнөн чочулап, Орусиядагы буталарга каршы колдонууга расмий уруксат бере элек. CNN телеканалынын Байдендин администрациясындагы булактары андай саясат өзгөрүүсүз каларын билдиришти.
Ошол эле маалда 11-сентябрда Киевге бараткан АКШнын мамлекеттик катчысы Энтони Блинкен уруксат берүү ыктымалдыгын жокко чыгарбасын The Times жазды.
Башкы дипломат Украинанын “орус агрессиясына натыйжалуу жооп кайтаруу жөндөмүнө көз саларын” айтты.
Блинкен Вашингтон украин президенти Владимир Зеленскийдин сунуштарын “угуп жана карап чыгарын” кошумчалады. Зеленский америкалык ракеталарды Орусиядагы маанилүү аскердик буталарга уруу уруксатын алууга аракет көрүп келет.
Өткөн аптада украин лидери Германиядагы жыйында Батышты орус аскерлерине каршы күрөшүп жаткан өлкөнүн жөндөмүн чектөбөөгө чакырган. АКШнын коргоо министри Ллойд Остин чектөөнү алып салуу согуштун нугун олуттуу өзгөртпөйт деп эсептейт.
Украинанын баш калаасына АКШнын мамкатчысы Энтони Блинкен жана Британиянын тышкы иштер министри Дэвид Лэмми барат.
Бул тууралуу АКШнын мамлекеттик департаментинен кабарлашты. Сапардын программасына Украинаны орусиялык агрессиядан коргоо үчүн өлкө президенти Владимир Зеленский менен жолугушуу да кирген.
АКШ Орусия Ирандан баллистикалык ракета алганын ырастады
Бул тууралуу шейшембиде АКШнын мамлекеттик катчысы Энтони Блинкен Британиянын тышкы иштер министри Дэвид Лэмми менен Лондондо жолукканда билдирди.
Ракеталар тууралуу айткан Блинкен чалгын кызматынын маалыматы АКШнын бардык өнөктөштөрүнө берилгенин белгиледи.
Блинкендин айтымында, Ирандын ракеталары Орусияга Украинадагы согуш болуп жаткан линиялардан алыс аймактарды атууга мүмкүнчүлүк берет. Ал эми Орусия Иранга ракета ордуна өзөктүк жана бир катар технологияларды берген.
Блинкен Иранга каршы жаңы санкция тууралуу да айтты - бул жолу ага Iran Air авиакомпаниясы дагы илинген.
АКШ жана Улуу Британия санкциялык тизмени кеңейтип, ага Орусия менен Ирандын жаңы компанияларын, жеке адамдарды киргизди. Бул жолу санкцияга Орусиянын Аба-космостук күчтөрү, Аскердик-транспорттук авиация командачылыгы жана 924-мамлекеттик учкучсуз авиация борбору илинди.
Улуу Британия Орусиянын Аскер-деңиз флотунун "Скиф-В", "Муса Жалил", "Бегей", "Балтийский-111" жана "Омский-103" (акыркы эки кеменин аты санкциялык тизмеге ката менен киргизилген - ред.) деген аталыштагы беш транспорттук кемесин кошту. Американын тизмесинде дагы бир нече жарандык кемелер бар.
Чектөөлөргө Ислам революциясынын сакчылар корпусунун бир нече жогорку офицерлери жана Иран армиясы менен өлкөнүн коргонуу тармагындагы компаниялары дуушар болду. Британ өкмөтү өз билдирүүсүндө ушундай эле санкцияларды АКШ да киргизерин билдирди.
Британия Иран менен эки тараптуу аба каттамдары боюнча келишимдерди жокко чыгарып, Iran Air авиакомпаниясынын Британияга учуу мүмкүнчүлүгүн чектейт. Компания азыр Лондонго учат. Иран авиакомпанияларынын Европа Биримдигине каттамдарына да чектөөлөр киргизилери күтүлүүдө.
Америка Кошмо Штаттары Iran Air авиакомпаниясын америкалык жарандар жана компаниялар менен ар кандай карым-катнаштарга тыюу салган санкциялардын тизмесине киргизди. Орусиянын "Трансморфлот" кеме компаниясы да ошол тизмеде.
Американын санкциялык тизмесине Оля деңиз портунун башкы директору Жамалдин Пашев да илинген. Порт Волга боюнда, Волга-Каспий каналынын оң жээгинде жайгашкан. Ал аркылуу Орусия менен Ирандын ортосунда жүк ташылат.
Вашингтон бир нече айдан бери Иранга Москвага баллистикалык ракеталарды бербөөнү эскертип келген.
Буга чейин АКШнын чалгын кызматтары Түндүк Корея Орусияга Украинадагы согушка колдонуу үчүн курал-жабдык жана ракеталарды жөнөткөнүн аныкташкан. Иран дагы Орусияга "Шахед" дрондорун жөнөтүп, Кремлге учкучсуз аппараттарды чыгарган завод курууга көмөктөшкөнү кабарланган.