3-сентябрда орус армиясынын Украинанын Полтава шаарына жасаган аба соккусунан 50дөн ашуун киши набыт болуп, 270тен көп адам жараат алды.
Алдын ала маалыматка караганда, калаага эки баллистикалык ракета менен сокку урулган. Бул тууралуу Украинанын президенти Владимир Зеленский билдирди. Чабуулда Байланыш институтунун имараттарынын бири жарым-жартылай талкаланган. Ошондой эле соккулардын бири ооруканага тийген.
"Полтава үчүн абдан кайгылуу күн",-деп жазды Полтава облусунун башчысы Филипп Пронин калаа тургундары кан тапшырып жатканын билдирди.
Чабуулдун чоо-жайы тууралуу маалымат берген жок.
Орусиялык аскердик Телеграм-каналдар Полтавага "Искандер-М" ракеталары менен чабуул жасалганын жазышты. Алар ырастагандай, украин армиясы үчүн "байланыш адистерин даярдаган борбор" бутага алынган.
Украинанын Запорожье аймагында орус армиясынын 3-сентябрга караган түнү жасаган чабуулдарынан эки адам каза болуп, дагы эки киши жараат алды. Бул тууралуу Запорожье облустук аскер башкармалыгынын башчысы Иван Федоров билдирди.
“Тилекке каршы, эки адам, анын ичинде сегиз жаштагы бала каза тапты. Дагы эки адам, анын ичинде 12 жаштагы кыз жарадар болду. Ал азыр реанимацияда. Душмандын чабуулунун натыйжасында имарат жарым-жартылай талкаланган”, - деп жазды Телеграмм-каналына.
Орусиянын аскерлери Украинанын аймактарына ар кандай курал-жарактар анын ичинде учкучсуз учактар, ракеталар менен байма-бай чабуул жасап жатат.
Украинанын президенти Владимир Зеленский Украинанын Курск облусунда 600дөн ашуун орусиялык аскер туткунга түшкөнүн билдирди.
Бул тууралуу ал Киевде Нидерланддын премьер-министри Дик Схоф менен бирге өткөн брифингде айтты. Буга Орусиянын Курск облусундагы август айындагы салгылашуулардын натыйжасында жетишилгенин кошумчалады.
"Курск операциясы жана алмашуу боюнча. Алмашуу фонду толукталып жатат жана алмашуу жүрө баштады", – деди ал.
Орусияда Украинанын соккусунан кийин күйө баштаган мунай базасындагы өрт эки аптадан кийин гана өчүрүлдү. Ростов облусундагы Пролетарск шаарында жайгашкан базада өрт дрон чабуулунан кийин 18-августта башталган, ал толук өчүрүлүп бүткөнүн 2-сентябрда өзгөчө кырдаалдар мекемесине таянып ТАСС маалымдады.
Өрт он миңдеген чарчы метрге жайылганы, жарылуу коркунучу жок экени, зыян зат жайылбаганы жана тегеректеги калкты эвакуациялоо зарылчылыгы жок экени кабарланган.
Дизелдик май куюлган жыйырма чакты цистерна күйгөнү айтылып, шаарда өзгөчө кырдаал жарыяланган. Беш күндөн кийин өрттөнүп жаткан мунай базасы кайрадан чабуулга кабылган.
Орусия бул соккулар үчүн Украинаны айыптаган. Украин тарап чабуулдарын тастыктап, Орусиянын «аскердик-экономикалык мүмкүнчүлүгүн алсыратуу» максаты коюлганын билдирген.
Украина 2022-жылдын февраль айынан бери Орусиянын агрессиясына каршы күрөшүн улантып келүүдө. Орус бийлиги "атайын аскердик операция" жүргүзүп жатканын айтууда.