Украинанын өзгөчө кырдаалдар боюнча мамлекеттик кызматы Сумыдагы соккуда жабыркагандар 18ге жеткенин билдирди. Маалыматка караганда, анын алтоо балдар. Буга чейин Сумынын полициясы 13 адам жабыркаганын, анын ичинде төртөө бала экенин билдирген.
1-сентябрда орус аскерлери балдардын социалдык-психологиялык реабилитациялоо борбору жана балдар үйү жайгашкан билим берүү мекемесине сокку урган. Имарат жарым-жартылай талкаланып, өрт чыккан. Жардыруудан жакын жайгашкан көп кабаттуу үйлөргө зыян келтирилген.
Киев жана башка шаарларга абадан сокку урулду
2024-жылдын 2-сентябрынын түнүндө жана таңында Украинага ар кандай типтеги сокку уруучу учкучсуз аппараттар жана ракеталар менен аба соккусу жасалды. Бул тууралуу “Азаттыктын” украин кызматы жазды. Түндүк тараптан өлкөгө бир нече «Шахед» тобу чабуул койгон, ошондой эле Ту-95тин учактарынан сокку жасалган.
Орусиянын аскерлери 2-сентябрга караган түнү Киевге ракеталык чабуул жасап, эки адам жаракат алды. Бул тууралуу Киевдин мэри Виталий Кличко билдирди. Маалыматка караганда, абадан атып түшүрүлгөн орусиялык ракеталардын сыныктарынан шаардын кеминде төрт районунда өрт чыкты.
Святошинск районунда ракетанын сыныктары түшкөн жайлардын биринде төрт автоунаа күйүп, бир имараттан өрт чыкты. Мындан тышкары, жүргүнчүлөр үчүн баш калкалоочу жай катары колдонулган “Святошина” метросунун станциясы, анын жанындагы күркө жабыркаган.
Шевченко районунда бир адам жаракат алды. Виталий Кличконун айтымында, Орусиянын ракета чабуулунан эки адам жабыркап, алардын бири ооруканага жаткырылган.
Киев шаардык аскердик администрациянын жетекчиси Сергей Попко Киевди түнкү аткылоо учурунда абадан коргонуу күчтөрү ондон ашык канаттуу жана онго жакын баллистикалык ракеталар атып түшүрүлгөнүн айтты.
Далилдерге карабай, Орусия жарандык жайларды жана карапайым тургундарды бутага алганын танып келатат.
Белгород ракеталык чабуулга кабылды
2024-жылдын 2-сентябрынын таңында Орусиянын Белгород шаары ракеталык чабуулга кабылды. Губернатор Вячеслав Гладков бул үчүн Украинанын Куралдуу Күчтөрүн күнөөлөдү. Анын айтымында, шаарда абадан коргонуу системасы иштеп, чабуулдун натыйжасында «бир социалдык жана бир коммерциялык объектке түздөн-түз тийүү» болгон. Ошондой эле эки жеке турак үй жана бир жеңил унаа жабыркаган. Гладков өзүнүн Телеграм каналында жабыркаган «Львенок» аттуу бала бакчанын сүрөтүн жарыялады.
Кийинчерээк, облус башчысы Белгород районунун Дубово кыштагынан бир аял минанын жарылуусунан жаракат алып, мээси чайкалып, аны тез жардам бригадасы облустук борбордогу №2 шаардык ооруканага жеткиргенин билдирди.
Белгороддогу бир катар мектептер ушул жумада аралыктан окутуу режиминде гана иштеп, аймактагы бала бакчалар жумушун токтотот деп чечилди.
1-сентябрда Белгороддо болгон чабуул учурунда көп кабаттуу үй жана бир нече унаа жабыркаган. 11 жай тургун жаракат алган, алардын арасында эки бала да бар.
Орус аскерлери жекшембиде Харьков шаарына 10 чакты сокку урду. Шаар бийлиги маалымдагандай, 40тан ашык киши жабыркады. Мэр Игорь Тереховдун айтымында, дүрмөттөрдун бири менчик үйлөр жайгашкан районго тийген, бир нече жайды, анын ичинде бир супермаркетти өрт чалды.
Облус администрациясынын башчысы Олег Синегубов жарандык инфраструктура, анын ичинде спорттук комплекс жана почта бөлүмү зыян тартканын билдирди. Алдын ала маалыматка караганда, соккулар ракеталар менен урулган.
Украиналык медиа маалымдагандай, Харьковдогу Спорт сарайы да бутага алынган. Имарат конгресс борбору катары да пайдаланылып келген.
Президент Владимир Зеленский 30дан ашык киши жарадар болгонун билдирип, соккулардын кесепети тартылган видеону жарыялады.
Кийин жабыркагандар 40тан ашканы маалымдалды.
Жараат алгандардын арасында эки медициналык кызматкер бар деп кабарланды.
Орусиялык аскерлер азырынча ал соккуларды комментарийлеген жок.
Бийликчил блогерлер чабуулдар украиналык жоокерлер жүргөн жерлерге коюлганын жазууда, бирок далилдерди келтиришкен жок.
Харьков аткылангандан көп өтпөй Орусиянын Белгород шаарында сокку коркунучу жарыяланды. Baza Телеграм-каналы сүрөт жарыялап, калаа чабуулга туш болгонун, бир машине өрттөнгөнүн, жабыркагандар бар экенин маалымдады. Бийлик азырынча маалымат бере элек.
Ишембиде Харьковдо аза күтүү күнү жарыяланган. 30-августта Орусиянын аба соккусунан 12 кабат турак үйдө алты киши, арасында 14 жаштагы өспүрүм каза тапты. Жүзгө чукул киши жабыркады.
Харьков акыркы айларда ракета жана авиабомбалардан көп аткыланып келатат. Натыйжада шаар тургундары каза таап, жарадар болууда.