Орусиянын Белгород облусунун губернатору Вячеслав Гладков украин аскерлери чек арадан өтүп, аймакка кирип барууга аракет кылып жатышканын билдирди.
"Орусиянын Коргоо министрлигинин маалыматына ылайык, чек арадагы кырдаал оор бойдон калууда. Бирок қөзөмөлдө. Биздин аскерлер пландалган иштерди аткарууда", - деп жазды Гладков Телеграмга.
Буга чейин украин аскерлеринин чек арадан өтүү далалаты тууралуу кремлчил Телеграм-каналдар жазышкан. Shot маалымдагандай, украин армиясы Белгород облусунун чек арасына жакындады. Mash "Шебекино" автоунаа өткөрмө бекетине жакын жерде кармаштар жүрүп жатканын кабарлады.
"Пепел" басылмасы Белгород жана Борисов райондорунда атышуулардын үнү угулуп жатканын жазды.
Бул маалыматтарды көз карандысыз булактардан ырастоо мүмкүн эмес. Расмий Киев Белгород жактагы кырдаал тууралуу эч кандай комментарий бере элек.
Украин армиясы Орусиянын Курск облусуна 6-августта кирип барган. Андан бери жүздөн көп калктуу конушту өз карамагына алып, Суджа шаарында комендантура ачканын билдирип келет. Ушул тапта украин армиясынын Курск облусундагы аскердик операциясы уланып жатат.
Чек арага жакын жайгашкан Белгород облусу Орусия Украинага согуш ачкан 2022-жылдын февраль айынан бери эле аткылоололорго, аба чабуулдарга дуушар болуп турган. Бир нече ирет легионерлерден турган топтор кол салууга аракет кылган.
27-августка караган түнү Орусиянын армиясы Украинанын аймактарына абадан жапырт чабуул коюуну улантты. Соккулардын бири Днепропетров облусуна караштуу Кривой Рог шаарындагы мейманканага тийип, кеминде төрт адамдын өмүрүн алганы кабарланды. Дагы бир нече кишинин дайыны табылбай жатат.
Облус губернатору Сергей Лысак Телеграм-каналы аркылуу билдиргендей, чабуулдун жыйынтыгында төрт көп кабатуу имарат жана дүкөн жабыркады.
Андан тышкары Запорожье облусунда эки адамдын өмүрү кыйылганын жергиликтүү бийлик билдирди.
Баш калаа Киевге чабуул койгон 15 дрондун баарын абадан коргонуу системасы жок кылганын шаар администрациясы маалымдады. Учкучсуз аппараттын калдыктары түшкөн токой чарбада өрт тутанганы белгилүү болду.
Украинанын Аба күчтөрү 27-августтун таңында жалпысынан 60тай дрон жана беш ракета атып түшүрүлгөнүн кабарлады.
26-августта дагы орус армиясы Украинанын аймагына 200дөн көп дрон жана ракета менен жапырт чабуул койгон. Жыйынтыгында жети киши набыт болуп, энергетикалык инфратүзүмдөр жабыркаган.
Украинанын президенти Владимир Зеленский союздаштарды "батыл чечимге" барып, Киевге Батыштын куралы менен Орусиянын аймактарындагы аскердик турумдарга сокку урууга уруксат берүүгө чакырды.
АКШ президенти Жо Байден 26-августта Украинага жасалган жапырт чабуулду "акылга сыйгыс" деп сынга алды.
Орусиянын Коргоо министрлиги дүйшөмбүдө Украинанын энергетикалык обьектилерине жапырт сокку урганын моюнга алган.
Чабуулдар украин армиясы Орусиянын Курск облусунда ондогон айыл-кыштактарды өз карамагына алып, аскердик операциясын улантып жаткан маалда болууда.
Орусиялык бир нече Telegram канал 26-августта Омск шаарында жайгашкан эң ири орусиялык мунай иштетүүчү заводдо катуу жарылуу болуп, өрт чыкканын кабарлашты. Канал 112 жана Baza кабарлагандай, "Газпромнефть-ОНПЗ" заводундагы жарылуудан кийин өрт каптаган аянт 1000 чарчы чакырымга жеткен.
Ишкананын жетекчилиги кырдаал көзөмөлдө экенин, заводдун иши үзгүлтүккө учурабаганын, "технологиялык жабдык күйгөнүн" билдирди.
Омск облусунун губернатору жети киши жараат алганын, кылмыш иши козголуп, тергөө башталганын, кырсыктын себептери иликтенип жатканын айтты.
"Газпромнефть-ОНПЗ" ишканасы жылына 22 миллион тонна мунайды иштетет.
Быйыл жыл башынан бери Орусиянын европалык бөлүгүндө бир топ мунай заводу украин учкучсуз учактарынын чабуулуна кабылып, айрымдары жарактан чыкты. Омск аймагынан Украинага чейинки аралык 2 миң чакырымды түзөт.
Бүгүнкү окуяга эмне себеп болгону азырынча так айтыла элек.