Украина жапырт аба чабуулуна кабылды

Президент Владимир Зеленский Курскидеги операциянын башкы максаты Украинаны коргоо үчүн Орусиянын аймагында буфердик зона түзүү экенин айтты. Украин армиясы Курск облусунда Сейм дарыясындагы үчүнчү көпүрөнү талкалаганын билдирди.

Украин армиясы Курск облусундагы Сейм дарыясына салынган үчүнчү көпүрөнү жок кылганын орус тарап 19-августта ырастады. Орусиянын Тергөө комитинин өкүлүнүн видеосун Кремлдин башкы пропагандачысы, тележурналист Владимир Соловьев Телеграм-каналына жарыялады. Анда комитеттин өкүлү бир күн мурда украин армиясы көпүрөнү талкалаганын айтат.

18-августта украин Аба күчтөрүнүн башчысы Никола Олещук армиясы Сейм дарыясындагы экинчи стратегиялык көпүрөнү иштен чыгарганын Телеграм-каналына жарыялаган.

“Украин аба күчтөрү так авиасоккулар менен душманды логистикалык мүмкүнчүлүктөрдөн ажыратып жатат. Мунун баары согуш аракеттерине олуттуу таасир тийгизет”, - деп кошумчалады ал.

Орусиялык аскердик блогерлер Курскидеги Жванное айылынын жанында талкаланган биринчи көпүрөнүн сүрөтүн жарыялашкан. Орусиянын коопсуздук тармагындагы аткаминерлердин айтымында, көпүрөлөрдүн талкаланышы Глушково айылынын бир бөлүгү менен байланышты үздү.

Аналитиктердин эсебинде, Сеймдеги көпүрүнүн жок кылынышы Украина үчүн чечкиндүү мааниге ээ.

"Глушково районундагы бардык орусиялык аскердик бөлүктөрдү материалдык-техникалык жактан камсыздоо үзгүлтүккө учурады. Алар Сейм дарыясынын өзүнө кептелип калышты", - дейт "Маалыматтык каршылык" тобунун координатору, аскердик эксперт Александр Коваленко.

Украин армиясы 6-августта Орусиянын Курск облусуна 6-августта күтүүсүздөн кирип барып, эки жарым жылдык согуштун динамикасын өзгөрткөндөй болду. Москва Украинага 2022-жылдын 24-февралында ар тараптан басып кирип, согуш ачкан. Андан бери дээрлик күн сайын абадан сокку уруп, узундугу миң чакырымга созулган согуш тилкесинин ар кайсы жеринен чабуул коюп келет.

Украинанын президенти Владимир Зеленский 18-августта билдиргендей, Курскидеги операция “орус армиясына, мамлекетине, алардын коргонуу өндүрүшүнө жана экономикасына кедергисин дагы эле тийгизип жатат”.

Ал кечиндеги кайрылуусунда украин куралдуу күчтөрүнүн командачысы, генерал-полковник Александр Сырскийдин сөзүнө шилтеп фронттогу кырдаал баардык багытта “жакшы көрсөткүчтөрдү” көрсөтүп жатканын айтты.

Зеленский: Башкы максатыбыз "буфердик зона" түзүү

Зеленский украин армиясынын Курскидеги башкы максаты “буфердик зона” түзүү максатында көбүрөөк орус потенциалын жок кылып, соккуларга каршы аракеттерди жүргүзүү экенин кошумчалады.

Украин президенти ошондой эле Донецкинин чыгыш тарабында айыгышкан салгылаш уланып жатканын айтты. Ал эми Орусиянын Коргоо министрлиги Украинанын Зализное айылын өз карамагына алганын ырастоодо.

“Покров багытында кырчылдашкан кармаштар жана Торецкини коргоо уланууда”,-деди Зеленский Телеграм аркылуу. Ал эми Донецк облусунун губернатору Вадим Филашкин “Покров калктуу конушунан үй-бүлөлөрдү бала-чакалары менен күчтөп эвакуацияны башташканын” маалымдады. 19-августта Донецкиде орус армиясынын аткылоосунан үч кишинин өмүрү кыйылып, он чактысы жараат алганы Филашкин кошумчалады.

Орусиянын армиясы Украинанын аймагына абадан чабуул коюуну улантып жатат. 18-августта соңку айда үчүнчү жолу украин баш калаасы Киевге баллистикалык ракеталар менен сокку урулду. Алардын көбү абадан атып түшүрүлгөнүн шаардык аскердик администрациясы билдирди. Бул жер кулаган ракетанын сыныгынан оюлуп калган.

Аскердик эксперттер ал Түндүк Кореяга таандык болушу мүмкүндүгүн боолгоп жатышат.

Беларус-украин чек арасындагы кырдаал

Курскиде окуялар өнүгүп жаткан маалда, Орусиянын президенти Владимир Путиндин кыйышпас өнөктөшү, Беларустун авторитардык лидери Александр Лукашенко Украина менен чек аралаш аймакта чыңалуу күчөп турганын айтты.

"Беларус-украин чек арасында 120 миңдей украиналык аскер жайгаштырылган. Аларды атайылап биздин чек аранын жанында кармап турушат. Алардын агрессиялык саясатын көрүп, биз дагы чек ара тилкесинин кайсы бир белгилүү жерлерине аскерлерди киргиздик. Согуш башталып кетсе, алар коргошот", - деди Лукашенко.

Беларустун жетекчиси чек арага жайгаштырылган аскерлеринин так санын атаган жок. Стратегиялык иликтөөлөр боюнча Military Balance эл аралык институтунун 2022-жылдагы маалыматына ылайык, беларус армиясында 48 миңдей аскер жана 12 миңдей чек арачы бар.

Киев бул тууралуу "Рейтердин" суроосуна жооп берген жок.

19-августка караган түнү Орусия Украинанын аймагына согуштук 11 дрон менен сокку урганын, анын баары атып түшүрүлгөнүн, бутага Николаев, Черкасск, Винница, Киев, Днепропетров, Харьков, Сумы жана Донецк облустары алынганын өлкөнүн Аба күчтөрүнүн командачысы Николай Олещук билдирди.

Орусия Курск менен чектеш Украинанын Сумы облусун өткөн жекшемби күнү 89 жолу аткылаганын, бир киши каза болгонун, үч киши жараат алганын жергиликтүү бийлик маалымдады.

Донецк облусунда Орусиянын аткылоосунун үч киши каза тапканын, тогуз киши жараат алганын облустук администрация башчысы Вадим Филашкин жазды.

Орусия Орлов облусунда өткөн түнү бир учкучсуз учак жок кылынганын кабарлады.

Украин аскерлери Курск облусунда Глушково аймагындагы дагы бир көпүрөнү (үчүнчүсүн) талкалаганы 19-августта кабарланды. Бирок бул маалымат азырынча расмий тастыктала элек. Сейм дарыясынын Глушково районундагы үч көпүрө аркылуу Орусия чек арадагы аскерлерин жабдып турчу.

Украин аскерлери фронттогу бардык багыттар боюнча жакшы натыйжа көрсөтүп жатканын, Орусиянын Курск облусундагы операциянын максаты буфердик зона түзүү экенин украин президенти Владимир Зеленский 18-августтун кечиндеги видео кайрылуусунда айтты.

Куралдуу күчтөрдүн башкы командачысы Александр Сырскийдин маалыматына таянып Зеленский «Украинанын чыгышында да, Курск облусундагы операция боюнча да, «айырбаштоо фонду», снаряддар, курал-жарак, бардык багыттар боюнча биздин балдар – азаматсыңар», – деди.

«Торецк шаарынын чет жакасында орусиялык техниканы жок кылуу боюнча жакшы жана зарыл натыйжа бар» экенин айткан Зеленский негизги максат «орусиялык потенциалды мүмкүн болушунча көбүрөөк талкалоо», анын арасында Курск операциясы аркылуу «буфердик зона» түзүү болуп жатканын кошумчалады.

Украина Орусиянын Курск облусунун аймагына 6-августта кирип барган. 13-августка карата бир нече багытта 500 метрден тартып 1,5 чакырымга чейинки аралыкка алдыга жылганын, 1150 чарчы чакырым жердеги 82 калктуу пунктту көзөмөлдөп турганын, бул операция башталгандан бери украин аскерлеринин Орусиянын аймагына ичкери жылуусу 35 чакырымга жеткенин Украинанын Куралдуу күчтөрүнүн башкы командачысы Александр Сырский билдирген.

Орусия украин тараптын бул билдирүүсү боюнча комментарий берген эмес. Бирок Курск жана Белгород облустарында федералдык деңгээлдеги өзгөчө кырдаал жарыялаган. Бир нече жараны каза болгонун да маалымдаган. Соңку билдирүүлөрүнө караганда, 200 миңдей жаранын эвакуациялады.

Зеленский 13-августтагы кайрылуусунда Курск облусунда жүздөгөн орусиялык аскер туткунга түшкөнүн билдирген. Москва комментарий берген эмес.

CNN телеканалы Орусия Курск облусунда түзүлгөн кырдаалдан улам Украинанын оккупациялап алган аймактарындагы айрым аскерлерин Курск тилкесине алып кеткенин жазды.

“Түндүк агым” газ кууруна жасалган чабуулдун артында Польша колдогон украин бийлиги турары жөнүндөгү билдирүүлөр негизсиз экенин 18-августта поляк президентинин жардамчысы Мешко Павляк билдирди:

«Бул таптакыр негизсиз жоромол сөз», — деди ал.

Жакында Германиянын чалгын кызматынын мурдагы башчысы Август Ханнинг Die Welt басылмасына курган маегинде чабуул уюштуруу тууралуу Польша жана Украина президенттеринин ортосунда макулдашуу болгонун айткан.

Немис жалпыга маалымдоо каражаттары чабуулга байланыштуу украиналык жаран шек саналып жатканын, Германия прокуратурасы аны Польшадан колго түшүрүү тууралуу ордер бергенин жазышкан.

Польша ордерди алганы, бирок шектүү жаран бул өлкөдөн чыгып кеткени белгилүү болгон.

Украина бул окуяга тиешеси жоктугун билдирип келет.

Орусия 2022-жылы Украинага кол салганга чейин аталган куур орус газын Балтика деңизи аркылуу Германияга, андан ары Европанын башка да өлкөлөрүнө жөнөтүүчү негизги жол болчу.

"Түндүк агым-1" жана "Түндүк агым-2" газ куурларынын төрт түтүгүнүн үчөө 2022-жылы сентябрдын соңунда жардыруудан жабыркаган. Жардыруу ушунчалык катуу болгондуктан 80 метрлик тереңдиктеги түтүктөр чачырап кеткен.

Германиянын өкмөтү билдиргендей, украиналык жаранды издөө Киев менен Берлиндин алакасына кедергисин тийгизбейт.