Бишкектеги "Манас" аба майданында Стамбулга рейсин күтүп отургандардын арасында Түркиядагы соңку окуялардан кабардар болбогондор бар экенин "Азаттыктын" кабарчысы маалымдады. Бирок көбү каттоодон өтүп жатат. Айрымдары рейс болсо да учпай эле коюуну ойлонуп жатат.
Түркиянын мурдагы өкмөт башчысы Ахмет Давудоглу Фейсбуктагы баракчасына "Элимди көчөгө чыгууга чакырам. Бул өлкөнү чыккынчыларга таштабайбыз" деп жазды.
Түркиянын бийлик булактары билдиргендей, Эрдоган ушу тапта өкмөттүк протоколго ылайык коопсуз аймакта. Премьер-министр Йылдырым Твиттерде коопсуздук кызматтары төңкөрүш жасагандардын жазасын берет деп белгиледи. Айрым маанилүү имараттар басып алынганын моюнга алып, ал калкты сабырдуулукка үндөп, демократияга каршы чагымдар жазасыз калбайт деп ишендирди. Стамбулдагы мамлекеттик телекомпания имаратынын жанында жардыруу болгону кабарланууда.