Токиодо өтүп жаткан Олимп оюндарынын он биринчи күнү Кыргызстан үчүн ооматтуу болду. Кыргызстандык балбан Акжол Махмудов грек-рим күрөшүнөн күмүш медал, кыз-келиндер күрөшүнөн Мээрим Жуманазарова коло медал утту. Ал эми Айсулуу Тыныбекова финалга чыкты.
Кыргызстан 13 жылдан бери Олимп оюндарында ийгилик жарата албай келген.
Кыргыз спортунун жаңы барагын ачкан балбандар
Акжол Махмудов: Өзүм ойлогондой күрөшө алган жокмун
Акжол Махмудов финалдык беттештен кийин “Азаттыктын” казак кызматынын журналисти Руслан Меделбекке алгачкы сезимдери тууралуу айтып берди.
“Экинчи болуп калдым, өзүм ойлогондой күрөшө алган жокмун. Эмнеге жөндөмдүү экенимди да көрсөтө алган жокмун. Финалда бир аз алаксып, өзүмдү колго ала алган жокмун. Финал болобу, канчанчы беттеш болбосун утулуп калгандан кийин сезимдер канааттандырарлык боло албай жатат. Утулуп калганыма бир аз маанайым чөгүп турат.Финалдан кийин президентибиз Садыр Нуркожоевич телефондон куттуктап чалды. Мен үчүн бул чоң сыймык. Президент өзү чалып куттуктаган менин жашоомдо биринчи ирет болуп жатат”,-деди Акжол.
Токиодогу Олимпиада оюндарында кыргызстандык балбан Мээрим Жуманазарова коло медал алды.
Ал 3-августта кыз-келиндер күрөшүнөн 68 килограмм салмакта монголиялык Соронзонболдын Батцэцэг менен беттешип, 10:1 эсебинде утту. Экинчи айлампада мөөнөтүнөн мурда атаандашынын далысын жерге басты.
Жуманазарова беттештерди 2-августта баштаган, алгач блогариялык Мими Христованы 7:5 эсебинде жеңген, чейрек финалда нигериялык Блессин Оборудудуга утулган. Кийин жооткотуучу беттеште азербайжандык Элис Манолованы 4:1 эсебинде жеңип, коло байге үчүн күрөшүүгө жолдомо алган.
Жапониянын баш калаасында өтүп жаткан Жайкы Олимпиадада кыргызстандык балбан Акжол Махмудов грек-рим күрөшүнөн 77 килограмм салмакта күмүш медал утту.
4-августта дагы Айсулуу Тыныбекова финалда күрөшөт.
Токиодо өтүп жаткан Олимп оюндарында кыргызстандык балбан Акжол Махмудов грек-рим күрөшүнөн 77 килограмм салмакта финалда венгриялык Тамас Лоринцке жеңилип (1:2), күмүш байгенин ээси болду.
Акжол Махмудов финалдык таймашка чейин төрт беттеш өткөргөн. Алгач тунистик Ламьед Маафини 11:0 эсеби менен уткан. Чейрек финалда азербайжандык Рафиг Хусейновду 9:1 эсеби менен жеңген. Жарым финалда армениялык Карапет Чальянды 6:2 эсебинде уткан болчу.
Бишкектеги борбордук аянтта, бир катар шаарларда чоң экрандар орнотулуп, күйөрмандар кыргызстандык балбанды сүрөөнгө алып турду. Акжолдун таймашына өзү төрөлгөн Араван районундагы жакындары, айылдаштары көз салып турушту.
Бул Токио Олимпиадасында Махмудовдон сырткары кыргызстандык спортчулардан Айсулуу Тыныбекова дагы финалда күрөшөт. Кыз-келиндер күрөшүнөн 62 килограмм салмакта Тыныбекова жарым финалда украиналык Ирина Коляденкону 10:0 эсебинде утту. Күрөштүн бул түрүнөн 68 килограмм салмакта Мээрим Жуманазарова коло байге үчүн күч сынашат.