Токио Олимп оюндарында кыргызстандык балбан Айсулуу Тыныбекова 3-августта кыз-келиндер күрөшүнөн 62 килограмм салмакта финалга чыкты. Ал жарым финалда украиналык спортчу Ирина Коляденкону 10:0 эсебинде утуп, мындай мүмкүнчүлүккө ээ болду.
Тыныбекова биринчи айлампада төрт упай алып алдыга чыккан. 2-айлампада алты упай топтоп, мөөнөтүнөн мурда 10:0 эсебинде жеңишти камсыздады. Ага чейин эки беттеш өткөргөн. Алгач латвиялык Анастасия Григорьеваны 8:0 эсебинде уткан. Чейрек финалда румыниялык Криста Тунде Инжени далысына басып, таза утту.
Токиодогу Олимп оюндарында 3-августта жеңил атлетика, спорттук гимнастика, бокс, эркин жана классикалык күрөш, веложарыш, трамплинден секирүү, оор атлетика сыяктуу спорт түрлөрүнөн 26 медалдар комплекти ойнотулат.
Көпчүлүк спорт күйөрмандары командалык спорт түрлөрү - футбол, баскетбол жана волейбол мелдештерине назар салып турат. Эркектер арасындагы футбол боюнча жарым финалдык беттештер өтөт. Бишкек убактысы боюнча саат 14:00дө Бразилия менен Мексика, Испания менен Жапония курама командасы беттешет.
Эркектер арасындагы волейболдун чейрек финалы дагы өтүп жатат. Орусиянын Олимпиада комитети Канаданын курамасын утуп, жарым финалга чыкты. Олимпиада чемпиону болгон бразилиялыктар Жапония менен жарым финалга чыгуу үчүн ойнойт. Польша менен Франция бет келсе, өткөн Олимпиаданын күмүш медалынын ээлери италиялыктар Аргентина курамасы менен ойнойт.
Токио Олимп оюндарында кыргызстандык балбан Айсулуу Тыныбекова 3-августта кыз-келиндер күрөшүнөн 62 килограмм салмакта жарым финалга чыкты. Ал чейрек финалда румыниялык Криста Тунде Инжени далысына басып, таза утту.
Эми ал жарым финалда украиналык спортчу Ирина Коляденко менен күрөшөт.
Токио Олимп оюндарында кыргызстандык балбан Айсулуу Тыныбекова 3-августта кыз-келиндер күрөшүнөн 62 килгограмм салмакта алгачкы атаандашы, латвиялык Анастасия Григорьеваны 8:0 эсебинде утуп, чейрек финалга чыкты. Чейрек финалда Тыныбекова румыниялык Криста Тунде Инже менен күрөшөт.
Ушул күнү грек-рим күрөшүнөн 87 килограмм салмакта Атабек Азизбеков мелдешти баштап, венгриялык Виктор Лоринске 1:6 эсебинде утулуп калды. Эгер Виктор Лоринс финалга чыкса, Атабек Азизбеков коло байге үчүн жооткочуучу беттеште күчүн сынайт.
Кыз-келиндер күрөшүнөн 68 клограмм салмакта Мээрим Жуманазарова жооткотуучу беттеште азербайжандык Элис Манолованы 4:1 эсебинде жеңди. Эми ал коло байге үчүн монголиялык Батцецег Соронзонболд менен күрөшөт. Дагы бир балбан Үзүр Жусупбеков грек-рим күрөшүнөн 97 килограмм салмакта жооткотуучу мелдеште финляндиялык Арви Мартин Совалайненге жеңилди.
3-августта балбан Акжол Махмудов грек-рим күрөшүнөн 77 килограмм салмакта финалда алтын медаль үчүн күрөшөт. Анын Атаандашы - венгриялык Таман Лоринц.
Жөө күлүк Нурсултан Кеңешбеков да ушул күнү 5000 метр аралыкка чуркап, күч сынашууга чыгат.