Текебаев абакка которулду
“Ата Мекен” партиясынын абактагы лидери Өмүрбек Текебаев Мирсаид Миррахимов атындагы Улуттук Кардиология борборунан Бишкектеги №47 абакка которулду. Ал өткөн жылдын 13-декабрынан бери аталган ооруканада жүрөк оорусунан дарыланып жаткан. Буга чейин экс-президент Роза Отунбаева жана парламенттеги алты фракциянын лидерлери мамлекет башчысы Сооронбай Жээнбековго кайрылып, Текебаевге ырайым берүүнү өтүнгөн. Алар “Мунапыстын жалпы принциптери жана ырайым берүү жөнүндө” мыйзамдын беренесине таянып мамлекет башчысы соттолуучу өзү кайрылбаса да, эмгектери же башка жөндүү себептери болсо ырайым бере ала турганын белгилеген. Президенттик аппарат аталган кайрылуу каралып жатканын айтканы менен азырынча жооп бере элек.