Президенттикке талапкер Адахан Мадумаров президенттик шайлоо өнөктүгү учурунда эле бир адамдын пайдасына мыйзам бузуулар орун алып жатканын белгиледи. Ал мындай пикирин бүгүн, 10-январда, Бишкектеги №1211 шайлоо тилкесинде добуш берген соң, журналисттердин суроолоруна жооп берип жатып айтты:
“Шайлоонун таза өтпөй жатканын кечээтен бери сиздер деле көрүп жатасыздар. Кыргызстандын бардык жеринде көчмө урна менен добуш берүүдө мыйзам бузуу көп болду. Мындай жапайычылыкты эгемен алгандан бери көрө элекпиз Анын баарына коомчулук баа берет. Үгүт иштери учурунда одоно мыйзам бузуулар болуп жатты. Биз бир нече талапкерлер маалымат жыйын куруп, далилдер менен айтып бергенбиз. Бирок БШК, сот органдары эч кандай чара көрүшкөн жок. Эгерде мен шайлоодон жеңип чыксам, анда 5-октябрдан кийин кабыл алынган чечимдерди жокко чыгарып, өлкөнү укуктук талаага кайтарып келем”.
Президенттикке талапкер Адахан Мадумаров - "Бүтүн Кыргызстан" партиясынын лидери. "Бүтүн Кыргызстан" 4-октябрдагы парламенттик шайлоодо добуштардын 7% арбын алган партиялардын катарына кирген.
Таластагы №6109 шайлоо участогунда добуштарды автоматтык түрдө эсептөөчү үкөк байма-бай иштебей калып жатканына байланыштуу байкоочулар нааразылык билдиришти.
Шайлоо участогунун төрайымы Багым Кыдыралиева бул техникалык мүчүлүштүктү жоюу аракети көрүлүп жатканын билдирди. Анын айтуусунда үкөк суукка байланыштуу иштебей калып жатышы ыктымал.
№6109 шайлоо тилкеси Талас шаарындагы медициналык колледжде жайгашкан. Шаардагы ири добушканалардын бири, анда 1719 адам каттоодо турат.
Жалпы облус аймагында 117 шайлоо тилкеси, 157 886 шайлоочу бар.
Облустук ички иштер башкармалыгы кабарлагандай, Таласта 500дөн ашуун милиция кызматкери тартипке көз салып жатат.
Бүгүн, 10-январь күнү Кыргызстандын президентин кезексиз шайлоо жана мамлекеттик башкаруу формасын аныктоо боюнча референдум өтүп жатат.
Ош шаардык аймактык шайлоо комиссиясына саат 10:30га чейин 20дан ашуун мүчүлүштүктөр тууралуу маалымат келип түштү. Үкөктөрдү калыбына келтирүү үчүн атайын топ иштеп жатат.
«Күндүн сууктугуна, техникалык себептерге байланыштуу автоматтык саноочу урналардын бузулуулары катталып жатат. Техникалык колдоо тобу көйгөйлөрдү чечип жатат. Айрым жерлерде аппараттарды алмаштырууга туура келип жатат»,- деди аймактык шайлоо комиссиясынын төрагасы Эралы Арынбаев.
№5287 шайлоо участкасынын төрайымы Жумакан Исмаилова сууктан улам, үкөк жана сканер аппараты иштебей калганын билдирди. Мындан улам кезек күткөндөр көбөйүүдө.
Ош шаарынын өзүндө катталган жалпы шайлоочулардын саны 151 миңден ашып, алар 87 шайлоо участкасында добуш беришет.